حالىقارالىق ءان بايقاۋىنا ءبىر كۇن قالعاندا باس جۇلدە العان ديماش قۇدايبەرگەن سويلەي الماي قالعان
بۇل تۋرالى پروديۋسەر، ءانشى لۇقپان جولداسوۆتىڭ جارى ايعان جولداسوۆا Baistars.kz باسىلىمىنا بەرگەن سۇحباتىندا مالىمدەدى.
«وسى بايقاۋعا دا بارىن سالىپ دايىندالدى. ءبىراق، كونكۋرسقا ءبىر كۇن قالعاندا تاماعى اۋىرىپ، ءتىپتى ءان ايتۋعا دا، سويلەۋگە دە بولمايتىنىن ايتقان ەكەن. سول كەزدە ءبارىمىز قاتتى الاڭدادىق. اۋىرىپ قالماعاندا بۇدان دا جاقسى ونەر كورسەتەر ەدى. دەگەنمەن، ءبارى جاقسى بولدى. اۋىرعاننىڭ وزىندە جاقسى ناتيجە كورسەتە ءبىلدى. ول ۇنەمى قانداي جاعداي بولماسىن، جول تابا بىلەدى. قازىر اتا-اناسىمەن ءالى ۆيتەبسكتە، قاشان كەلەتىنىن بىلمەيمىز. ازىرگە مازالاماۋعا تىرىسىپ وتىرمىز»، - دەدى جولداسوۆا.
سونىمەن قاتار، ول ديماشتىڭ قىر-سىرىن اشىپ، بالا كۇنىندە قانداي بولعانىن ايتىپ بەردى. ونىڭ ايتۋىنشا، ديماش استانادا وقيدى، ال اتا-اناسى اقتوبەدە تۇرادى ەكەن. «ولار الماتىعا كەلگەندە مىندەتتى تۇردە ءبىزدىڭ ۇيگە كەلىپ، قوناق بولادى. سوندىقتان، مەن ديماشتى بالا كۇنىنەن بىلەمىن. العاشىندا ونىڭ ءان ايتاتىنىن بىلمەيتىنبىز. ءبىر كۇنى ول ءان ايتىپ وتىرعاندا تالانتى بار ەكەنىن بايقادىق.
ونىڭ «سلاۆيان بازارى» بايقاۋىنا قاتىساتىنىن ەستىگەن كەزدە، ۇلكەن ءۇمىت ارتتىق. سەبەبى، ديماش كەز- كەلگەن، ءتىپتى جوعارى نوتالى اندەردى ەركىن ايتادى. دياپازونى كەڭ، مۇمكىندىكتەرى مول ءانشى. ونەردى جوعارى باعالايدى. تەك مۋزىكامەن ءومىر سۇرەدى. وسى جاعىنان لۇقپانعا قاتتى ۇقسايدى، مىنەزى دە. ونى ديماشتىڭ اتا-اناسى دا ايتىپ وتىرادى»، - دەدى ايعان جولداسوۆا.
ەسكە سالايىق، قازاقستاندىق ءانشى ديماش قۇدايبەرگەن ۆيتەبسكتە ءوتىپ جاتقان ەسترادا اندەرى ورىنداۋشىلارىنىڭ XXIV حالىقارالىق «سلاۆيان بازارى-2015» كونكۋرسىنىڭ گران- پري جۇلدەسىن يەلەنگەن ەدى. ول ەكى كۇننىڭ قورىتىندىسى بويىنشا 175 بالل جينادى. سايىستىڭ ەكىنشى كۇنىندە ديماش فرانسۋزدىڭ Sos dun terien un detresse ءانىن ورىندادى. ديماش قۇدايبەرگەن گران-پري جۇلدەسى ءۇشىن 20 مىڭ دوللار كولەمىندە اقشالاي سىيلىققا يە بولدى. ءۇش كۇن بولعان شارادا قازاقستاندىق ءانشى وق بويى وزىق بولدى.
