قازاقستاننان قىتايعا جاڭا اۋە رەيستەرى اشىلادى
قازاقستاندىق دەلەگاتسيانى ازاماتتىق اۆياتسيا كوميتەتى ءتوراعاسىنىڭ ورىنباسارى تالعات لاستايەۆ، ال قىتاي جاعىن ق ح ر- نىڭ اۆياتسيالىق اكىمشىلىگى باستىعىنىڭ ورىنباسارى ۆانگ جيكينگ باسقاردى. تاراپتار ەكى ەل اراسىنداعى ۇشۋلار قۇقىعىن ەداۋىر ۇلعايتۋعا كەلىستى، دەپ حابارلايدى قر يدم باسپا ءسوز قىزمەتىنەن.
تالعات لاستايەۆ اتاپ وتكەندەي، قازاقستاندىق اۆياكومپانيالاردىڭ ۇشۋىنا بولاتىن قىتاي قالالارىنىڭ سانى ەكى ەسەگە ارتتى. ەندىگى جەردە ءبىزدىڭ كومپانيالار ەلىمىزدىڭ كەز كەلگەن قالاسىنان تەك قانا بەيجىڭ، ءۇرىمجى، سانيۋ قالالارى عانا ەمەس، سونداي-اق شاڭحاي، شيان، چىڭدۋ سياقتى مەگاپوليستەرگە ۇشا الاتىن بولدى.
«سكات» اۋە كومپانياسى الماتىدان سيانعا 2015 -جىلى، استانادان سيانعا، اقتاۋدان ۇرىمجىگە 2016 -جىلى، سونداي- اق الماتى مەن استانادان شاڭحايعا 2017 -جىلى رەيستەر اشۋدى جوسپارلاۋدا. «ەير استانا» اۋە كومپانياسى استانادان شاڭحايعا 2019 -جىلى جانە چەنگدۋعا 2018 -جىلى رەيس اشۋدى جوسپارلاپ وتىر. رۇقسات ەتىلگەن باعىتتار سانى 12 ەسە كوبەيدى، ونىڭ ىشىندە قىتايعا ۇشاتىن رەيستەر سانى %130 عا ارتتى. قىتاي تاسىمالداۋشىلارى استانا مەن قىزىلورداعا رەيستەر اشۋدى جوسپارلاۋدا.
«ەير استانانىڭ» دەرەكتەرىنە قاراعاندا، قىتايدان قازاقستانعا قاراي ترانزيتتىك جولاۋشىلار اعىنى كەيىنگى 3 جىلدا %81 عا ارتىپ، 70 مىڭ جولاۋشى بولدى. قىتاي تاراپىنىڭ اقپاراتىنا قاراعاندا، قىتايدىڭ اۋە كولىگىمەن سىرتقا شىققان تۋريزم كولەمى 2014 -جىلى 115 ميلليون ادام بولعان. وسى كولەمنىڭ تەك قانا %1 ىن تارتۋدىڭ ءوزى 10 ميلليون جولاۋشىدان ارتادى، ال بۇنىڭ قازاقستاننىڭ اۋە كومپانيالارى مەن اۋەجايلارى ءۇشىن وراسان مۋلتيپليكاتيۆتىك تيىمدىلىگى بولادى.
سالىستىرۋ ءۇشىن ايتا كەتەيىك، 2014 -جىلى قازاقستاندا بارلىعى 5,4 ميلليونعا جۋىق جولاۋشى تاسىمالدانعان.
كەلىسسوزدەر قورىتىندىسى بويىنشا قول قويىلعان كەلىسىم قازاقستاننىڭ ترانزيتتىك مۇمكىندىكتەرىن پايدالانۋعا جانە جىبەك جولى ەكونوميكالىق بەلدەۋىنىڭ دامۋىنا جاڭا پەرسپەكتيۆالار اشاتىن بولادى.
