قادىر كەشىندە وي، نيەتىڭىزدىڭ بارشاسى ءبىر اللاعا ىقىلاستى بولۋى كەرەك - نايب-ءمۇفتي
وسىعان وراي، ازىرەت سۇلتان مەشىتىنىڭ باس يمامى، قازاقستان مۇسىلماندارى ءدىني باسقارماسىنىڭ نايب- ءمۇفتيى سەرىكباي قاجى وراز تىلشىلەرگە سۇحبات بەرىپ، جاماعاتقا ءوزىنىڭ ۇندەۋىن جاريا ەتتى.
«بۇگىن ادامزات ءۇشىن، مۇسىلمان بالاسى ءۇشىن اسا ماڭىزدى جىلىنا ءبىر رەت كەلەتىن، وتە ساۋاپتى ءتۇن - قادىر كەشى بولادى. قاسيەتتى قۇراندا: «قادىر تۇنىندە قۇراندى تۇسىردىك، يگىلىكتە ساۋابى مىڭ ايدان ارتىق» دەپ اياتتاردا بايان ەتىلەدى.
پايعامبارىمىزدىڭ حاديسىندە اللانىڭ ەلشىسى راسۋلۋللاھ: «قادىر ءتۇنى مەنىڭ ۇممەتىمە ەرەكشە قۇرمەتپەن بەرىلگەن، ويتكەنى مۇحاممەد پايعامبارىمىزدان (س. ع. س) الدىڭعى ۇممەتتەردە مۇنداي ءبىر تۇندە مىڭ ايعا لايىقتى يگىلىككە كەنەلەتىن حايىر مەن بەرەكەتتىڭ بولماعاندىعى» ايتىلادى.
پايعامبارىمىزدان الدىڭعى ۇممەت بۇرىنعى پايعامبارلاردىڭ كەزىندەگى ۇرپاقتىڭ عۇمىر ءسۇرۋ جاسى ەداۋىر ۇزىن بولادى ەكەن. سوندا پايعامبارىمىز (س. ع. س) ءوز ۇممەتى مەن وزىنەن كەيىنگى ۇرپاقتىڭ جاسى، عۇمىرى قىسقا بولعاندىقتان، اللانىڭ قۇلشىلىعىنا، تاۋبە ەتۋگە ۋاقىت وتە از بولىپ قالاتىندىعىنا ول كىسى قاتتى ىشتەي تولعاناتىن، سول ساتتە اللادان قۇراننىڭ وسى اياتى ءتۇسىپ، قادىر كەشى مۇحاممەد پايعامباردىڭ (س. ع. س) ۇممەتتەرىنە سىي رەتىندە بەرىلگەن»، - دەيدى نايب- ءمۇفتي.
ونىڭ ايتۋىنشا، بۇل ءتۇنى اسپان ايقارا اشىلىپ، مىڭداعان پەرىشتەلەر اللانىڭ قۇدىرەتى بويىنشا جەرگە تۇسەدى.
«اللانىڭ ەلشىسى پايعامبارىمىزدىڭ حاديسىندە بىلاي دەپ ايتىلادى: «كىمدە-كىم قادىر ءتۇنىن شىنايى سەنىممەن، ىقىلاسپەن، ءبىر اللانىڭ ريزالىعىنا بولەنۋ ءۇشىن نيەتپەنەن، قۇلشىلىقپەن وتكىزسە، ونىڭ بۇرىنعى كۇنالارىن اللا تاعالا كەشىرەدى».
ەندى وسىعان ءوزىمىز ءبىر زەر سالىپ، قاراپ كورسەك. مىڭ اي دەگەنىمىز - يگىلىكتە 83 -جىل سانالى عۇمىر كەشكەن، ءۇزىلىسسىز، توقتاۋسىز ءومىرىن عيباداتپەن وتكىزگەن ادامنىڭ سانالى عۇمىرى. وسى يگىلىكتى ءبىر تۇندە بەرەتىن يگىلىكتە قانداي ماعىنا جاتىر. بۇنىڭ ساۋابىنداعى ماسەلە، دەمەك، اللا تاعالا بۇل كۇنى اسپان ەسىكتەرى ايقارا اشىلىپ، اللانىڭ ءامىرىن ورىندايتىن پەرىشتەلەر جەرگە ءتۇسىپ، كىسىلەردىڭ ءىس- امالدارىن باقىلايدى. ءبىز قانداي ويدا ءجۇرمىز، ءبىزدىڭ كوڭىلىمىزدە، جۇرەگىمىزدە تۇرعان دۇنيەلەردىڭ بارشاسى - اللاعا ايان»، - دەپ اتاپ ءوتتى باس يمام.
جاسىرىن ەمەس، ادامداردىڭ ءبىر بولىگى قادىر ءتۇنىن قالاي وتكىزۋ كەرەكتىگىن تولىق بىلمەيدى. وسىعان بايلانىستى سەرىكباي قاجى وراز، وسى ءتۇنى جاسالاتىن ءىس- امالدارعا دا توقتالدى.
«قادىر ءتۇنىن ءبىز قالاي وتكىزۋىمىز كەرەك؟! مۇحاممەد پايعامبارىمىز (س. ع. س) رامازان ايىنىڭ سوڭعى 10 كۇنىن ەرەكشە، ەلدەن وقشاۋلانىپ، قۇلشىلىقتا وتكىزەتىنى جايىندا ايشا انامىزدان ريۋايات ەتىلگەن حاديسى بار. وندا: «و، اللانىڭ ەلشىسى، قادىر تۇنىندە قانداي دۇعالاردى جاساعانىم ابزال بولادى» دەپ سۇرادى. سوندا ايشا انامىز: «ۋا، اللا، سەن تىم كەشىرىمدىسىڭ! كەشىرگەندى، جارىلقاعاندى جاقسى كورەسىڭ! ءبىزدىڭ كۇنالارىمىزدى عافۋ ەتىپ، وسى قادىر ءتۇنىنىڭ قۇرمەتىنە كەشىرە گور!» دەگەن دۇعانى جاساۋ كەرەك دەگەن ەكەن»، - دەدى قاجى.
ونىڭ سوزىنە قاراعاندا، اللا تاعالا ادامزاتقا وسىنداي يگىلىكتى بەرگەن قاسيەتتى قۇراننىڭ بۇگىنگى سوڭعى دۇعاسى وسى قادىر تۇنىنە سايكەس كەلىپ وتىر.
«سوندىقتان جاماعاتىمىزدىڭ وسى كەشتە ۋاقىل، وي، نيەتىڭىزدىڭ بارشاسى ءبىر اللاعا ىقىلاستى بولۋى كەرەك. ۇيدە وتكىزۋگە دە بولادى. مەشىتكە بارۋ شارت ەمەس. ەڭ باستىسى - وسى تۇندە باسقا ءدۇنياۋي تىرشىلىكتىڭ بارشاسىن ءبىر ساتكە تارك ەتىپ، جان- دۇنيەڭىز اللانىڭ قۇلشىلىعىمەن بايلانىسىپ تۇرۋى كەرەك. اللانى زىكىر ەتۋى كەرەك. وسىنشا شەكسىز قۇدىرەتتىڭ يەسى بولعان، ءبىزدىڭ اقىل- پاراساتىمىز دا جەتپەيتىن تىرشىلىككە ءبىر ءسات كوز جۇگىرتىپ جانە ءوزىمىزدىڭ جۇرەگىمىزگە تىنىشتىق بەرىپ، يماندى كۇشەيتۋىمىز كەرەك ەكەن. قادىر تۇنىندە وتكەن وقىلماي قالعان نامازدار، وتكەن اتتەگەن- اي تىرشىلىكتەگى قانداي دا ءبىر پەندەشىلىكتەرىمىزدى، قاتەلىكتەرىمىزدى زەردەلەي وتىرىپ، اللادان سودان تاۋبە تىلەيتىن بولساق، اللا سول تاۋبەلەرىمىزدى، دۇعالارىمىزدى قابىل ەتەدى»، - دەپ جالعادى س. وراز.
«قادىر دەگەن ءسوزدى ءبىزدىڭ حالقىمىز دا ەرەكشە قۇرمەتتەيدى. باردىڭ قادىرى، اللانىڭ بەرگەن جاقسىلىق- يگىلىكتىڭ قادىرى. ادامزات دەگەننىڭ ءوزى ۇمىتشاق كەلەدى. باسىنداعى بولعان قيىندىقتى دا ءاپ- ساتتە ۇمىتىپ كەتەمىز، بولىپ تۇرعان جاقسىلىقتىڭ دا قادىرىن بىلمەي ۇمىتىپ جاتامىز.
بۇل قادىر - سول اللانىڭ بەرگەن يگىلىكتەرىنە قادىرىن جاساپ، ساراپتاي وتىرىپ، بولاشاققا جاقسى ءۇمىت ەتۋ. بولاشاعىم جارقىن بولسىن، جانۇيام امان بولسىن، اللام باقىتقا بولەپ، قانداي وي- ماقساتتارىم بولسا، ورىندالسىن دەگەن تىلەك- نيەت بولسا، ول وسى كەشتە ينشاللاھ اللا قابىل ەتىپ، ورىندالادى، نيەتتەر قابىل بولادى. بۇگىنگى ءساتتى پايدالانا وتىرىپ، جالپى قازاقستان مۇسىلماندار قاۋىمىن قاسيەتتى رامازان ايىنداعى قۇران تۇسكەن قادىر كەشىمەن، وسى قادىر تۇنىندە اللانىڭ ەرەكشە مەيىرىمگە بولەگەن، كەشىرىم مەن راقىم كەشىمەن شىن جۇرەكتەن قۇتتىقتايمىن! ەلىمىزگە، جۇرتىمىزعا اماندىق بەرسىن! قادىر تۇنىندەگى قۇلشىلىقتارىمىز قابىل بولسىن! مۇراتىمىز اسىل بولسىن، كەلەر جىلى وسىنداي جاقسى اي، جاقسى كۇندەردە امان- ەسەن جەتە بەرۋدى اللا بارشامىزعا ءناسىپ ەتسىن!»، - دەپ ءتۇيدى ءسوزىن نايب- ءمۇفتي.
اۆتور: جاسۇلان جولدىبايەۆ
