ەلوردادا «ءتۇرلى-ءتۇستى» مارافون ءوتتى

استانا. قازاقپارات - استانادا وسىمەن ءۇشىنشى رەت وتكىزىلىپ وتىرعان ياركوكروسس قايىرىمدىلىق شاراسىنا مىڭداعان جاستار قاتىستى.

بۇل اكسيا «ەڭ باقىتتى بەس شاقىرىم» دەگەن اتاۋمەن دە بەلگىلى. وسى بەس شاقىرىمنىڭ ءار شاقىرىمىنداعى 5 ءتۇرلى-ءتۇستى ستانسيادا كۇتىپ تۇرعان ەرىكتىلەر جۇگىرىسكە قاتىسۋشىلارعا ءار ءتۇرلى بوياۋلار شاشادى. سورە سىزىعىنان اق كيىممەن شىققان قاتىسۋشىلار مارەگە ءتۇرلى-ءتۇستى بولىپ كەلەدى دەۋگە دە بولادى. بۇل شارا ءبىر جاعىنان ءۇندىستاندا اقپاننىڭ اياعى مەن ناۋرىزدىڭ باسىندا كوكتەمنىڭ كەلۋىنە وراي وتكىزىلەتىن «حولي» مەرەكەسىن دە ەسكە سالادى.

بۇگىندە مۇنداي ءتۇرلى-ءتۇستى مارافوندار الەمنىڭ 50 دەن استام ەلىندە وتكىزىلەدى. شارانى استانا اكىمدىگىنىڭ قولداۋىمەن «Posadiderevo.kz»  رەسپۋبليكالىق قوعامدىق بىرلەستىگى ۇيىمداستىرىپ وتىر.

ايتا كەتەيىك، بيىل ياركوكروسس شاراسى الماتىدا 7- ماۋسىمدا ءوتىپ، وعان 10 مىڭنان استام ادام قاتىستى. سونداي-اق، وسى جىلى الماتى، استانا، قاراعاندىدان باسقا شىمكەنتتە دە وتكىزىلەدى.

شاراعا قاتىسۋ بيلەتى 2000 تەڭگە تۇرادى. تۇسكەن قاراجات قالانى جاسىلداندىرۋعا ارنالعان جوبالارعا جۇمسالادى.

اۆتور: ءابۋ-اسقار مەكەش ۇلى