گرەكيا پارلامەنتى داعدارىستان شىعۋدىڭ جاڭا جوسپارىن ماقۇلدادى

استانا. قازاقپارات - كارى قۇرلىق نازارى قازىر گرەكياداعى احۋالعا اۋىپ وتىرعانى جاسىرىن ەمەس.

سەنبىگە قاراعان ءتۇنى گرەكيا پارلامەنتى ەلدىڭ پرەمەر-ءمينيسترى الەكسيس تسيپراسقا قولداۋ ءبىلدىرىپ، داعدارىستان شىعۋدىڭ جاڭا جوسپارىن ماقۇلدادى. بۇل ەكونوميكالىق رەفورمالار جوباسىندا وتكەن جەكسەنبى، 5- شىلدە كۇنى حالىقتىق رەفەرەندۋمدا گرەكتەر قارسى داۋىس بەرگەن بىرنەشە پۋنكت بار.

ەكونوميكالىق قارىزدى ازايتۋعا باعىتتالعان باعدارلاما ءۇش جىلدىق مەرزىمدە جۇزەگە اسىرىلماق، دەپ حابارلايدى BBC.

تسيپراس بۇل «اۋىر رەفورمالار باعدارلاماسى» ەكەنىن ايتا كەلە، اتالعان قۇجات گرەكياعا ەۋروايماقتا قالۋعا مۇمكىندىك بەرەدى دەپ اتاپ ءوتتى. ەۋرووداق بۇل باعدارلاماعا «جان-جاقتى ويلاستىرىلعان» دەگەن باعا بەرگەن بولاتىن.

سەنبى كۇنى ەۋروايماق ەلدەرىنىڭ قارجى مينيسترلەرى دەڭگەيىندەگى ەۋروتوپ گرەكيا رەفورمالارىن تالقىلاۋ ءۇشىن جينالادى، ال جەكسەنبىدە بۇل ماسەلە ەۋرووداق سامميتىندە قارالادى.

الدىن الا مالىمەتتەر بويىنشا گرەكيا پرەمەر-ءمينيسترى الەكسيس تسيپراس سالىق كولەمىن ۇلعايتۋعا، زەينەتاقى جۇيەسىن رەفورمالاۋعا كەلىسىم بەرىپ وتىر. سونداي-اق گرەكيا ۇكىمەتى 12 ميلليارد ەۋرودان استام سوماعا بيۋدجەتتىك شىعىنداردى ازايتادى. داعدارىسقا قارسى جاڭا جوسپار بويىنشا

ق ق س ستاۆكاسىن 23 پايىز دەڭگەيىندە بىرىزدەندىرۋ؛

2016-جىلدان باستاپ قورعانىسقا ارنالعان شىعىنداردى 300 ميلليون ەۋروعا قىسقارتۋ؛

پورتتاردى جەكەشەلەندىرۋ؛

وتە تەلەكوممۋنيكاتسيالىق الپاۋىت كومپانياسىنىڭ قالعان اكسيالارىن ساتىلىمعا شىعارۋ؛

ءبىرقاتار ارالدار ءۇشىن قاراستىرىلعان 30 پايىزدىق سالىق جەڭىلدىكتەرىن الىپ تاستاۋ سەكىلدى شارالار قامتىلعان.

ەسەسىنە تسيپراس ۇكىمەتى 53,5 ميلليارد ەۋرو كولەمىندە جاڭا قارجىلىق قولداۋ، گرەكيا قارىزدارىن قايتا قۇرىلىمداۋ مۇمكىندىگىن قاراستىرۋدى سۇراپ وتىر.