ۇلتتىق اتوم كومپانياسى وتاندىق ونىمدەرگە دەن قويدى

استانا. قازاقپارات - «قاز اتوم ونەركاسىپ» ۇلتتىق اتوم كومپانياسى وندىرىسكە قاجەتتى قۇرال- سايمانداردان باستاپ كيىم- كەشەكتەرگە دەيىن وتاندىق تاۋار وندىرۋشىلەردەن ساتىپ الماق.

 ۇلتتىق كومپانيا وسى ماقساتقا 4,6 ميلليارد تەڭگە ءبولىپ وتىر، دەپ حابارلادى www.24.kz.

تابيعي ۋران وندىرۋدە الەمدە كوش باستاعان جەتەكشى كومپانيا باسشىسى اسقار جۇماعاليەۆ وڭتۇستىك قازاقستان وبلىسىنا جاساعان جۇمىس ساپارى بارىسىندا وسىلاي دەپ مالىمدەدى.

بۇل ءوز كەزەگىندە كاسىپكەرلەردىڭ جۇمىس اۋقىمىن كەڭەيتىپ، ايماقتىڭ دامۋىنا جاڭا سەرپىن بەرەدى. ەلىمىزدەگى ەڭ ءىرى تابيعي ۋران ءوندىرۋشى كومپانيا باسشىسى الدىمەن وبلىس اكىمىمەن ەكىجاقتى ىنتىماقتاستىق تۋرالى مەموراندۋمعا قول قويدى. ماڭىزدى قۇجات اياسىندا ۇلتتىق كومپانيا بۇدان بىلاي تەك وتاندىق ءونىمدى ساتىپ الماق.

 وسى ماقساتقا 4,6 ميلليارد تەڭگە ءبولىپ وتىر. قانجۋعان كەنىشىندەگى اففيناجدى زاۋىت ۋراندى ايماقتا جاسالاتىن تەمىر بوشكەلەرگە قۇيىپ شىعارىپ جاتىر. بۇرىن كاسىپورىن مۇنداي ىدىستاردى دا شەتتەن اكەلەتىن. ەندىگى جەردە وندىرىسكە قاجەتتى باسقا دا تاۋارلار تەك جەرگىلىكتى كاسىپورىنداردان ساتىپ الىنادى. «بۇل ءوز كەزەگىندە كاسىپكەرلەر اراسىنداعى باسەكەلەستىكتى ارتتىرادى»، - دەيدى ماماندار.

 «جالپى ايتاتىن بولساق، تاۋارلاردىڭ ىشىندە ءبىز ترانسفورماتور جانە ارنايى كيىم تاعى دا باسقا تاۋارلار ساتىپ الامىز. بۇل جۇمىستى ءبىز تەك قانا مەموراندۋم اياسىندا جاسامايمىز. ونى ارى قاراي جالعاستىراتىن بولامىز، - دەدى «قاز اتوم ونەركاسىپ» ۇا ك» ا ق باسقارما ءتوراعاسى  اسقار جۇماعاليەۆ.

ۇلتتىق كومپانيانىڭ ءوندىرىس ورىندارى نەگىزىنەن سوزاق اۋدانىنىڭ اۋماعىندا ورنالاسقان. ويتكەنى ەلىمىزدەگى جەر استى تابيعي ۋران قورىنىڭ باسىم بولىگى وسىندا جاتىر. اففيناجدى زاۋىت شىعاراتىن ۋراننىڭ شالا توتىعى مەن حيميالىق كونسەنتراتىنا دەگەن سۇرانىس تا جوعارى. باستىسى، جەر استى قازبا بايلىعى جابىق ءارى ەكولوگيالىق جاعىنان ەڭ ءتيىمدى تاسىلمەن وندىرىلەدى.

اففيناجدى سەح باسشىسى قانات نۇرجانوۆتىڭ ايتۋىنشا، دايىن ءونىم سەرتيفيكاتتالىپ، ساراپتامادان وتكەننەن كەيىن ەكسپورتقا جىبەرىلەدى. قازىر ءونىمدى قىتاي، فرانسيا سياقتى تاعى باسقا مەملەكەتتەر ساتىپ الىپ جاتىر. جىلىنا 1380 توننا ءونىم وندىرە الادى. باستى ماقسات - العا قويعان جوسپارلاردى ويداعىداي ورىنداۋ.

الەمنىڭ جەتەكشى ۋران ءوندىرۋشى كومپانيالارىنىڭ كوشىن باستاعان ۇلتتىق كاسىپورىن ءونىم كولەمىن ودان ءارى ارتتىرماق نيەتتە. وسى ماقساتتا ەنشىلەس كومپانيا كەڭسەلەرىن الماتىدان شىمكەنتكە كوشىرمەك. باسشىلىقتىڭ وندىرىسكە جاقىنداۋى ايماقتىڭ دامۋىنا جاڭا سەرپىن بەرىپ، كومپانيا تيىمدىلىگىن ارتتىرىپ، جاڭا جۇمىس ورىندارىن اشۋعا سەپ بولماق.