از قامتىلعان وتباسى بالالارى مەكتەپتەردە تەگىن تاماقتانادى

 استانا. قازاقپارات - از قامتىلعان وتباسى بالالارى مەكتەپتەردە تەگىن تاماقتانا الادى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.

«بۇگىندە از قامتىلعان وتباسى وقۋشىلارىنا قاتىستى جۇيە قالدىرىلادى. الەۋمەتتىك جاعىنان از قامتىلعان وقۋشىلار جەرگىلىكتى بيۋدجەتتىڭ ەسەبىنەن مەكتەپتە تەگىن تاماقانا الادى. جىل سايىن وعان جەرگىلىكتى قاراجاتتار قاراستىرىلىپ وتىرادى. ول جۇيە قالادى»، - دەپ اتاپ ءوتتى مينيستر.

ءوز كەزەگىندە ق ر پرەمەر- ءمينيسترىنىڭ ورىنباسارى بەردىبەك ساپاربايەۆ وقۋشىلاردىڭ تاماقتانۋىن قامتاماسىز ەتۋگە بيزنەسمەندەردى تارتۋ قاجەتتىگىن تىلگە تيەك ەتتى.

«جەرگىلىكتى بيۋدجەتتەن وقۋشىلار تاماعىنا قاجەتتى قاراجاتتى قاراستىرۋ كەرەك. ءبىراق سونىمەن قاتار بۇعان كاسىپكەرلەردى دە تارتۋىمىز كەرەك. ول نەگىزىنەن از قامتىلعان بالالارعا قاتىستى»، - دەدى ب. ساپاربايەۆ.

 اۆتور: جاسۇلان جولدىبايەۆ