16:21, 10 - شىلدە 2015 | GMT +6
ءۇندىستان پرەمەرى رەسمي ساپارمەن پاكىستانعا بارۋعا كەلىستى
استانا. قازاقپارات - ءۇندىستان پرەمەر- ءمينيسترى نارەندرا مودي پاكىستاننىڭ پرەمەر- ءمينيسترى ناۆاز شاريفتىڭ 2016 - جىلى ساپارمەن كەلۋ تۋرالى شاقىرۋىن قابىل الدى، دەپ حابارلادى بي-بي-سي اگەنتتىگى.
ءساۋىر ايىندا ءۇندىستان پاكىستاندىق تاراپتى ءوزىنىڭ ىشكى ىسىنە ارالاستى دەپ ايىپتاعان سوڭ ەكى ەل اراسىنداعى قاتىناس قايتا بۇزىلدى.
شاريف موديدى كەلەسى جىلى يسلامابادتا وتەتىن ايماقتىق ىنتىماقتاستىقتىڭ وڭتۇستىك ازيا قاۋىمداستىعىنىڭ سامميتىنە قاتىسۋعا شاقىردى.
بۇل موديدىڭ پرەمەر لاۋازىمىنداعى پاكىستانعا باراتىن العاشقى ساپارى بولماق.
جۇما كۇنى مودي مەن شاريف ۋفاداعى ب ر ي ك س سامميتىنىڭ الاڭىندا كەلىسسوزدەر جۇرگىزدى. بۇل ەكى پرەمەردىڭ وتكەن جىلدىڭ مامىر ايىندا بولعان مودي يناۋگۋراتسياسىنان كەيىنگى العاشقى كەزدەسۋى. ەكى ەل تاۋەلسىزدىككە يە بولعان 1947 - جىلدان بەرى ءبىر ەلدىڭ ليدەرى ەكىنشى ەل باسشىسىنىڭ ۇلىقتاۋىنا العاش رەت قاتىسقان.
