اتىراۋلىق تازالىق مەكەمەسى قايرات نۇرتاستىڭ كونسەرتىن ۇيىمداستىرۋشىلاردى سوتقا بەردى
اتىراۋدا قايرات نۇرتاستىڭ كونسەرتىن ۇيىمداستىرۋشىلاردىڭ باسى بالەگە قالاتىن ءتۇرى بار. قالانى تازالىقپەن قامتيتىن «ارناۋلى اۆتوبازا» كوممۋنالدىق مەكەمەسى، كونسەرت جارنامالارىن ايالدامالارعا رۇقساتسىز جاپسىرعانى ءۇشىن، جەكە كاسىپكەرلىكتى سوتقا بەردى.
ساكەن جەكەبايەۆ، «ارناۋلى اۆتوبازا» ك م ك ديرەكتورىنىڭ ورىنباسارى:
-قازىرگى ۋاقىتتا قايرات نۇرتاس كونسەرتىنىڭ جارناماسىن جاپسىرۋ دەرەگى بويىنشا «Show service» جەكە كاسىپكەرلىگىنە قاتىستى ءىس ەكونوميكالىق سوتتا قارالۋدا. 24 ايالداما پاۆيلونى ءبۇلىندى. شىعىن كولەمى - 1 ميلليون 70 مىڭ تەڭگە. ءبىز وبلىستىق اۋدانارالىق ەكونوميكالىق سوت ارقىلى وندىرگىمىز كەلەدى. مەنىڭ ويىمشا، جارنامالار ەپوكسيدتىك جەلىمدەرمەن جاپسىرىلعان. اينەككە جاققان كەزدە قانشا حيميالىق تازالىق زاتتارمەن سۇرتسە دە، كەتپەيدى. ءبارىبىر ءىزى قالىپ قويادى. ءتىپتى اينەكتى الماستىرۋعا تۋرا كەلەدى.
ايتا كەتەيىك، قايرات نۇرتاس پەن سەرىك يبراگيموۆتىڭ «ەكى جۇلدىز» اتتى كونسەرتى اتىراۋدا 30 -ماۋسىمدا انشلاگپەن وتكەن ەدى. جۇلدىزدار كەتكەنىمەن، ايالدامالاردا، باعانداردا، عيمارات قورشاۋلارى، ءتىپتى كوپ قاباتتى ۇيلەردىڭ قابىرعالارىندا دا افيشالار ءالى تۇر. تازالىقشىلار جەلىمنىڭ مىقتىلىعىنان قالانىڭ كوركىن بۇزعان جارنامالاردى الىپ تاستاۋ قيىن، - دەيدى.
«ارناۋلى اۆتوبازا» مەكەمەسى باسشىلىعىنىڭ ايتۋىنشا، مەكەمە بالانسىنداعى ايالدامالاردا تەك اۆتوبۋستاردىڭ كەستەسى عانا ءىلىنىپ تۇرۋى ءتيىس. شاھاردا جارناما ىلەتىن ارنايى ورىندار بار. سوندىقتان جەرگىلىكتى مادەني وشاقتارعا كونسەرت ۇيىمداستىرۋشىلارمەن كەلىسسوز جۇرگىزگەن كەزدە وسى جايتتى ەسكەرتۋدى قاتاڭ تالاپ ەتىپ وتىر.
ال «قوس جۇلدىزدىڭ» كونسەرتىن ۇيىمداستىرىپ، باسى داۋعا قالعان جەكە كاسىپكەرلىكتىڭ ۇستىنەن سوتقا تالاپ ارىز بەرىلگەنىن بىلمەيتىن بوپ شىقتى. ءبىراق ءبىزدىڭ تىلشىلەرىمىزگە قانداي دا ءبىر تۇسىنىك بەرۋدەن باس تارتتى.
«astanatv.kz»
