اتىراۋدا شاپشاڭ وقۋ جانە ينتەللەكتىنى دامىتۋ مەكتەبى اشىلدى - فوتو
جوبانى اتىراۋ وبلىسى كاسىپكەرلەر پالاتاسى جانىنان قۇرىلعان جاس كاسىپكەرلەر مەكتەبى جۇزەگە اسىردى.
«شاپشاڭ وقۋ جانە ينتەللەكتىنى دامىتۋ - بۇل ءبىلىم بەرۋ قىزمەتى سالاسىنداعى جاڭا باعىت. بۇل ادىستەمە تۇتاستاي العاندا ينتەللەكتىنى دامىتۋعا جانە ادام ميىنىڭ ەكى جارتى شارلارىنىڭ ۇيلەسىمدى دامۋىنا باعىتتالعان. بۇگىندە مۇنداي مەكتەپتەر رەسەي قالالارىندا جانە باسقا دا ەلدەردە بارعان سايىن كەڭىنەن تانىمال بولىپ كەلەدى»، - دەپ حاباردار ەتتى اتىراۋ وبلىسى كاسىپكەرلەر پالاتاسىنىڭ باسپا ءسوز قىزمەتى.
«شىندىعىندا ءبىز شاپشاڭ وقۋ جونىندەگى كۋرستاردى ءوزىمىز ءۇشىن ىزدەگەن بولاتىنبىز، ودان كەيىن ينتەرنەتتەن وسى تاماشا مەكتەپتى تاپتىق. ولاردىڭ ادىستەمەسىن كورگەن سوڭ وزىمىزدە اشىپ، قالا تۇرعىندارىمەن وسى ادىستەمە جايلى وي ءبولىسۋدى ۇيعاردىق. بۇدان ءارى ەرەسەكتەرگە العاشقى كىرىسپە كۋرسىن جانە بالالارعا بايقاۋ ساباقتارىن وتكىزدىك»، - دەدى قازاقپارات تىلشىسىنە شاپشاڭ وقۋ جانە ينتەللەكتىنى دامىتۋ بويىنشا سەرتيفيكاتتى مامان نۇرگۇل دۇيسەعاليەۆا.
مەكتەپتە ساباق بەرەتىن ەكى پەداگوگ ر ف- نىڭ چەليابى وبلىسىنداعى زلاتوۋست قالاسىندا IQ 007 شاپشاڭ وقۋ جانە ينتەللەكتىنى دامىتۋ مەكتەبىندە جاڭا ادىستەمەنى وقىتۋدان ءوتتى. ولاردىڭ ەكەۋىندە دە ءتيىستى سەرتيفيكاتتارى بار. بىرەگەي اۆتورلىق ادىستەمە وقۋشىلاردىڭ بارلىق جاس ەرەكشەلىكتەرىن ەسكەرۋگە مۇمكىندىك بەرەدى. ءبىلىم باعدارلاماسى 4 جاستان باستاپ، جاسوسپىرىمدەردى جانە ەرەسەك ادامداردى وقىتۋعا ارنالعان.
ن. دۇيسەعاليەۆانىڭ ايتۋىنشا، اعىمداعى جىلى قوسىمشا پەداگوگتەردى وقىتۋدان وتكىزىپ، مەكتەپتى دامىتۋ جانە تاعى ءبىر فيليال اشۋ جوسپارلانۋدا. ال بولاشاقتا اتىراۋدا تۇتاس وسىنداي ءبىلىم ورتالىعى جەلىسىن قۇرۋ كوزدەلىپ وتىر.
