لاتىن امەريكاسىنىڭ ەلدەرى تاكسي كومپانياسىن جابۋدى تالاپ ەتۋدە
بۇگىندە الەمنىڭ 45 ەلىنىڭ 200 قالاسىندا قىزمەت كورسەتەتىن بۇل كومپانيا ءوز جۇمىسىن باستاعالى بەرى كوپتەگەن داۋعا قالىپ كەلەدى.
سەبەبى جەرگىلىكتى تاكسي جۇرگىزۋشىلەرى Uber جۇرگىزۋشىلەرىنىڭ سالدارىنان كاسىپتەرىنىڭ تۇرالاپ جاتقانىن ايتۋدا. شەرۋگە شىعۋ ارقىلى ولار ەل بيلىگىنەن بۇل كومپانيانىڭ جۇمىسىنا تىيىم سالۋىن تالاپ ەتۋدە.
برازيلياداعى ەڭ ءىرى سان- پاۋلۋ قالاسىنىڭ باسشىلىعى ۇيالى قوسىمشا ارقىلى قىزمەت كورسەتەتىن Uber كومپانياسىنىڭ قىزمەتىنە تىيىم سالۋدى قولداپ، داۋىس بەرگەنىنە قاراماستان، كومپانيا ءوز جۇمىسىن جالعاستىرۋدا.
اتالعان قۇجات اتقارۋشى بيلىك ورىندارى ماقۇلداپ، قالا مەرى بەكىتكەندە عانا كۇشىنە ەنەدى. ال Uber كومپانياسى قىزمەتىن زاڭداستىرىپ، رەسمي تۇردە تىركەۋدى كوزدەپ وتىر.
فابيو سابا، Uber كومپانياسىنىڭ برازيلياداعى وكىلى:
- قالا تۇرعىندارى دىتتەگەن جەرىنە جەتۋ ءۇشىن كەز كەلگەن قىزمەت ءتۇرىن پايدالانا الادى. ءبىز كاسىبىمىزدى زاڭداستىرۋ ءۇشىن بيلىك باسىنداعىلارمەن بايلانىسىپ، ولارعا ۇيالى قوسىمشانىڭ قالاي جۇمىس ىستەيتىنىن تۇسىندىرگىمىز كەلەدى.
كومپانيا وكىلدەرىنىڭ مالىمدەۋىنشە، Uber ۇيالى قوسىمشاسىن قولدانۋ قاراپايىم ازاماتتار ءۇشىن ءتيىمدى ءارى قاۋىپسىز. ولار تاسىمالداۋشى كولىك تۋرالى الدىن الا بارلىق اقپاراتقا قانىق بولادى. ءارى قىزمەت ءتۇرى بارىنشا قولايلى. ءتىپتى جۇرگىزۋشىلەرى جولاۋشىلارىنا تەگىن سۋ ۇسىناتىن كورىنەدى. سونداي-اق رەسمي تاكسيگە قاراعاندا، جولاقىسى ارزان.
ءساۋىر ايىنان بەرى تەك سان- پاۋلۋ كالاسىنىڭ وزىندە Uber قوسىمشاسىن جۇكتەپ الۋشىلار سانى بەس ەسەگە ارتىپ وتىر. الايدا برازيليانىڭ ءىرى قالالارىنداعى تاكسي جۇرگىزۋشىلەرى بۇل جۇيەنىڭ ولاردىڭ قىزمەتىنە كەدەرگى بولاتىنىن ايتىپ، نارازىلىق ءبىلدىردى. سان- پاۋلۋ مەرىنەن Uber - دىڭ جۇمىسىنا تىيىم سالۋدى تالاپ ەتتى.
ەدميلسون امەريكانو، تاكسي جۇرگىزۋشىلەرى قاۋىمداستىعىنىڭ پرەزيدەنتى:
- ازاماتتارىمىزدى، تاكسي جۇرگىزۋشىلەردىڭ قۇقىقتارىن قورعاۋ ءۇشىن سالانى رەتتەۋ قاجەت. ەگەر جولاۋشىنى قاجەت جەرىنە جەتكىزىپ جۇرسە، وندا بۇل قالاي دا تاكسي قىزمەتىنە جاتادى. سوندىقتان Uber- دى جابۋ كەرەك.
ماسەلەنىڭ شيەلەنىسكەنى سونشالىق، سەنبى كۇنى ريو- دە- جانەيرو قالاسىندا Uber جۇرگىزۋشىسىنە تاكسيست شابۋىل جاساپ، وق اتقان. مۇنداي جاعداي كولۋمبيادا دا بولدى. جەرگىلىكتى بيلىك وسى قىزمەت ءتۇرىن زاڭسىز دەپ تاۋىپ، بىرنەشە اۆتوكولىكتى تاركىلەگەن. ال مەكسيكا بيلىگى تاكسي جۇرگىزۋشىلەرىنىڭ بۇلقىنعانىنا قاراماستان Uber كومپانياسىن زاڭدى تۇردە تىركەۋگە الماق. بۇل ەلدە Uber جۇرگىزۋشىلەرى رۇقسات قاعازىن الۋى ءۇشىن جىل سايىن 101 دوللار، وعان قوسا تابىسىنىڭ %1,5 ىن كولىك تاسىمالداۋ قورىنا اۋدارىپ وتىرۋعا مىندەتتى بولادى.
www.24.kz
