باتىرحان شۇكەنوۆتىڭ ۇلى نيۋ-يوركتە وتكەن اكەسىنىڭ ەسكە الۋ كەشىنە باردى

استانا. قازاقپارات - نيۋ-يوركتە ءانشى، كومپوزيتور باتىرحان شۇكەنوۆتى ەسكە الۋ كەشى ءوتتى.

ق ر مادەنيەت قايراتكەرى شۇكەنوۆ  ب ۇ ۇ بالالار قورىنىڭ ەرىكتى ەلشىسى بولدى. ول كوزى ءتىرى كەزىندە بۇل قالاعا ءجيى بارعان جانە ب ۇ ۇ شتاب-پاتەرىندەگى ءىس-شارالارعا قاتىسىپ تۇرعان. سوندىقتان دوستارى مەن تۋىستارى ەسكە الۋ كەشىن نيۋ-يوركتە وتكىزدى.

قازىر ءانشىنىڭ ۇلى ماقسۇت اناسىمەن بىرگە فلوريدا قالاسىندا، ال ۇستازى ۆلاديمير زاسلاۆسكي نيۋ-دجەرسيدە تۇرادى. سونىمەن بىرگە ا ق ش، لوس-اندجەلەس، ۆاشينگتوندا دا ونىڭ كوپتەگەن دوستارى بار. ولاردىڭ بارلىعى ەسكە الۋ كەشىنە جينالدى، دەپ جازادى baistars.kz.

ءانشىنىڭ امەريكاداعى تىڭدارماندارى مەن قازاقستانداعى ارىپتەستەرى باتىرحان شۇكەنوۆتىڭ قاپىدا بولعان قازاسىنا ءالى دە قايعىرۋدا. كەش بارىسىندا قازاقستاندىق جاننا ورىنباساروۆا، التىناي ساپارعاليەۆا ءانشىنىڭ «دجيليا»، «تۆوي شاگي»، «نەليۋبيمايا» سىندى اندەرىن شىرقاعاندا جينالعاندار كوزدەرىنە جاس الدى.

«باتىردىڭ قازاسى مەن ءۇشىن اۋىر ءتيدى. ءومىرىمنىڭ ءبىر بولشەگىنەن ايىرىلعانداي بولدىم. ءبىراق ەكەۋمىز ءبىراز ۋاقىق بىرگە جۇمىس جاسادىق. سوندىقتان ءوزىمدى باقىتتى اداممىن دەپ ەسەپتەيمىن. ءبىز بىرگە گاسترولدىك ساپارلارعا، ءتۇرلى بايقاۋلارعا بارعانبىز. ول جۇلدىز بولعان كەزىندە دە وزگەرگەن ەمەس»، - دەپ ەسكە الدى ۇستازى ۆلاديمير زاسلاۆسكي.

«باتىر الەم ادامى بولدى. قازىر ورتامىزدا ونىڭ جوقتىعى بىلىنەدى. ءبىراق جۇرەگىمىزدە ماڭگى قالادى. ونىڭ اندەرىن ەشقاشان ۇمىتپايمىز»، - دەدى ءوز كەزەگىندە جاننا ورىنباساروۆا.