قىتاي حالىق رەسپۋبليكاسىنىڭ ءتوراعاسى «سوعىسۋ يدەولوگياسىن» ۇمىتۋعا ۇندەدى
«تاريحتى ۇمىتۋ بارىپ تۇرعان ساتقىندىق بولار ەدى. بيىل ب ۇ ۇ- نىڭ قۇرىلعانىنا 75 جىل تولدى، انتيفاشيستىك سوعىستىڭ اياقتالعانىنا 70 -جىل تولدى. بريكس- قا مۇشە مەملەكەتتەر بەيبىتشىلىكتى تۋ ەتكەن باسقا دا ەلدەرمەن بىرگە ەكىنشى دۇنيەجۇزىلىك سوعىستىڭ تاريحىن جوققا شىعارىپ، ونىڭ تاريحىن قايتا جازىپ شىعامىن دەگەن كەز كەلگەن ارەكەتكە بىرگە قارسى تۇرۋ كەرەك»، - دەگەن شي جينپيڭ وسى سوعىستان ساباق الىپ، قازىرگى زاماندا «سوعىسۋ يدەولوگياسىن» ۇمىتۋ كەرەكتىگىن باسا ايتتى.
«سوعىسۋ يدەولوگياسىن مۇلدە ۇمىتۋ كەرەك، ودان باس تارتۋ كەرەك. ايماق پەن بۇكىل الەمدە بەيبىتشىلىكتى ساقتاۋ ءۇشىن كۇش سالۋ كەرەك. كەز كەلگەن جاعدايدا ارىپتەستىك قارىم- قاتىناسقا قول جەتكىزۋ كەرەك»، - دەدى ق ح ر ءتوراعاسى ءوز سوزىندە.
ەستەرىڭىزگە سالا كەتەيىك، بۇگىن ۋفادا بريكس سامميتى ءوتىپ، وسى ۇيىمعا مۇشە مەملەكەت باسشىلارى كەڭەيتىلگەن وتىرىس وتكىزدى. بريكس - بۇل برازيليا، رەسەي، ءۇندىستان، قىتاي جانە وڭتۇستىك افريكا رەسپۋبليكالارى بىرىگىپ وتىرعان توپ. بۇل ۇيىمدى قۇرۋ تۋرالى باستاما 2006 -جىلى رەسەي فەدەراتسياسىنىڭ تاراپىنان ايتىلعان بولاتىن.
قازىر دە بريكس ەكونوميكالىق ءارى ساياسي ىقپالى بار حالىقارالىق ۇيىمعا اينالىپ وتىر. ال، بريكس- تىڭ ۋفاداعى سامميتىندە ۇيىمعا مۇشە مەملەكەتتەر ەڭ الدىمەن حالىقارالىق ەكونوميكالىق جاعدايدى ساۋىقتىرۋ ماسەلەلەرىن، سونداي-اق ساۋدا- ينۆەستيتسيالىق بايلانىستاردى ءوزارا كەڭەيتۋ ماسەلەلەرىن تالقىلاماق.
ر ف پرەزيدەنتىنىڭ كومەكشىسى يۋريي ۋشاكوۆ ءمالىم ەتكەندەي، كەزدەسۋلەردىڭ قورىتىندىسى رەتىندە بريكس- قا مۇشە مەملەكەتتەر ۋفا دەكلاراتسياسى مەن ءىس- قيمىلدار جوسپارىن قابىلداماق.
