قورعاستا شەكارادان كونتراباندالىق جۇك تاسۋشىلار تىيىلدى

استانا. قازاقپارات - «قورعاستا» شەكارا بەكەتى ارقىلى كونتراباندالىق جۇك تاسۋشىلاردىڭ ءىس- ارەكەتى تىيىلدى.

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى داۋلەت ەرعوجين ءمالىم ەتتى.

«قازىرگى ۋاقىتتا كونتراباندالىق تاسىمالدى ۇيىمداستىرۋعا قاتىسى بار ادامداردى قوسا العانداعى بارلىق تۇلعالاردى ىزدەۋ باعىتىنداعى قاجەتتى شارالار جۇرگىزىلۋدە»، - دەپ ناقتىلادى ول.

ونىڭ اتاپ وتۋىنشە، «قورعاس» شەكارا بەكەتىندە ازىق- تۇلىك پەن تۇرمىستىق زاتتاردى كونتراباندالىق جولمەن تاسىمالداۋ ارناسى دا جويىلعان. «ءبىز ارى- بەرى وتەتىن ادامدار سانىن تومەندەتتىك. ول جاققا جۇك تاسىمالداۋشىلار ءوتىپ، جۇزدەگەن كەلى تاۋاردى بەرى الىپ كەلەتىن. ول، ءتىپتى بوتەننىڭ مۇلكى. ياعني، مۇنى كونتراباندالىق دەسەك تە بولادى. ولار جۇكتى اكەلىپ بەرگەندەرى ءۇشىن سىياقى الىپ وتىرعان»، - دەدى كوميتەت باسشىسى.

ونىڭ سوزىنە قاراعاندا، الدىن الۋ شارالارى قولعا الىنعانعا دەيىن ءساۋىر ايىندا «قورعاس» شەكاراسىن شامامەن 110 مىڭ ادام كەسىپ وتسە، اعىمداعى جىلدىڭ ماۋسىم ايىندا ولاردىڭ سانى 74 مىڭعا دەيىن تومەندەگەن. «بۇعان قوسا، ارى- بەرى وتەتىن ادامدار سانى قىسقارعانىنا قاراماستان بيۋدجەتكە تۇسەتىن تولەمدەر سانى 11 ميلليوننان 17 ميلليونعا دەيىن ارتتى. ياعني، قابىلدانعان شارالار ءوز ناتيجەسىن بەرە باستادى» ، - دەدى د. ەرعوجين.

اۆتور: مارلان جيەمباي