ەڭ كوپ تاياق جەگەن بوكسشى

استانا. قازاقپارات - چەمپيوندار ساقتارىن سىندىرعان ءبىر عانا جەڭىلىستەن كەيىن سپورتتان كەتىپ جاتسا، جەڭىلىسپەن ءوز اتتارىن شىعارعان ادامدار دا ەكەن.

مىسالى، الەمدەگى ەڭ جولى بولماعىش بوكسشى، امەريكاندىق رەدجي ستريكلاند سياقتى. ول ەكى رەكوردتىڭ يەگەرى بولىپ تابىلادى: كاسىپقوي بوكستا ەڭ كوپ جەكپە-جەك وتكىزگەن سپورتشى (363 كەزدەسۋ) جانە بوكس تاريحىندا ەڭ كوپ ( 276 رەت) جەڭىلگەن بوكسشى. بوكسشى كوپ جەكپە- ەكتەرگە لاقاپ اتپەن قاتىسقاندىقتان، ونىڭ جەڭىلىسى بۇدان دا كوپ بولۋى ابدەن ىقتيمال.

رەدجيدىڭ سپورتتاعى كارەراسى 1987-جىلى، 19 جاسىندا باستالعان. جاس بوكسشى، بوكستاسا جۇرەيىن دەسە كەرەك، ءبىر ايدىڭ ىشىندە ون بەس شاقتى كەزدەسۋگە قاتىسادى. ارينە، ول تەك جەڭىلە بەرگەن جوق، جەڭىستەرى دە بولدى، ءبىراق ءالسىز دەگەن بوكسشىلاردى عانا جەڭە الدى. جەكپە-جەكتەردىڭ دەنى ونىڭ قارسىلاستارىنىڭ جەڭىسىمەن اياقتالىپ جاتتى. ستاتيستيكاعا سۇيەنسەك، رەدجي ستريكلاند ومىرىندە نەبارى 14 بوكسشىنى عانا جەڭىپتى، ونىڭ وزىندە العاش رەت رينگكە شىققان بوكسشىلاردى عانا.

ستريكلاند ءالى كۇنگە دەيىن رينگكە شىعاتىن كورىنەدى. كورەرمەندەردىڭ كوزايىمى بولماسا دا، ونى وزىنشە جاقسى كورەتىن كورەرمەندەر بارشىلىق، ول قاتىساتىن جەكپە-جەكتەردى امەريكانىڭ تانىمال تەلەارنالارى ترانسلياتسيالايدى.

رەدجيدىڭ تۋىستارىدا بوكستان الىس ەمەس. مىسالى، رەدجيدىڭ اعاسى دجەري ستريكلاند 112 جەكپە-جەكتىڭ 100 ىندە جەڭىلگەن، ال ونىڭ جۇبايى 30 كەزدەسۋدىڭ 28 ىندە جەڭىلگەن. ونىمەن قويماي، بولەسى دجوش تا وسى «تاياق جەگىشتەردىڭ» تىزىمىنە كىرىپ وتىر، ول 74 كەزدەسۋدىڭ 68 ىندە جەڭىلىپ قالعان. ولاردان كەيىنگى ۇرپاق تا «قالىسار ەمەس»: رەدجيدىڭ نەمەرە ءىنىسى دجەي دە وتكىزگەن بارلىق 28 كەزدەسۋدە جەڭىلىپ، «جوسپاردى ءجۇز پايىزعا ورىنداپ وتىر».

بوكسشى رۋكتى بىلەسىزدەر مە ؟

گولليۆۋدتىق تانىمال اكتەر ميككي رۋرك 90- جىلدارى، اكتەرلىق مانسابى قۇلدىراي باستاعان كەزدە، كاسىپقوي بوكسپەن اينالىسقانىن بىلەسىزدەر مە؟ ۇلكەن جەتىستىككە جەتە قويعان جوق، ال قارسىلاستارىنان جەگەن تاياقتاردىڭ سالدارىنان بەتى «بىت-شىت» بولدى. ونىڭ جاعى، مۇرنى، قابىرعاسى سىنادى. سونىڭ سالدارىنان ول بىرنەشە رەت وپەراتسياعا تۇسەدى، ال سىنعان مۇرنىن رەتكە كەلتىرۋ ءۇشىن حيرۋرگتار ونىڭ قۇلاعىنان ءسىڭىر الادى.

وسىعان قاراماستان، رۋرك ءۇشىن بوكسقا كەتىپ قالۋ ويلانباي قابىلدانعان شەشىم ەمەس-ءتى: اكتەر بالا كەزىنەن بوكسپەن اينالىسقان، ونىڭ ۇستىنە مىنەزى دە قىزۋقاندى بولعان. بىلەتىندەردىڭ ايتۋىنشا، ونىڭ بوكستى تاڭداۋىنا وگەي اكەسىنىڭ تاياقتارى سەبەپ بولعان، ءبىراق كەيىن رۋرك ەسەسىن قايتارعان.

قيىن بالالىق شاق ونىڭ مىنەزىن ءبىر جاعىنان شىنىقتىرسا، ەكىنشى جاعىنان جامان جولعا سالدى دەۋگە بولادى. ءبىراق، رينگتەگى ءبىرازعا سوزىلعان «جەكپە-جەكتەر» كەزەڭىنەن كەيىن رۋرك كينوعا «رەستلەر» فيلمىمەن ورالدى.

«الامان»