ا ق ش لاڭكەستەرگە قارسى تويتارىستى كۇشەيتپەك
بۇل تۋرالى پەنتاگوندا ارنايى وتكىزىلگەن كەڭەس بارىسىندا باراك وباما مالىمدەدى. ونىڭ ايتۋىنشا، ا ق ش- تىڭ بۇل ارەكەتى سيريا مەن يراك جەرىندەگى شەتەلدىك لاڭكەستەردىڭ جولىن كەسۋگە سەپتىگىن تيگىزبەك.
سونداي- اق ول يسلامشىل راديكالدى توپتارمەن اراداعى كۇرەس ناۋقانى تاياۋ ۋاقىت ىشىندە توقتاتىلا قويمايتىنىن جەتكىزدى. ا ق ش اۋە كۇشتەرى وتكەن جەكسەنبىنىڭ وزىندە سودىرلار شوعىرلانعان ايماققا 18 سوققى بەرىپ، 16 كوپىر مەن جۇك كولىكتەرىن تالقانداعان. ال جالپى وسى ۋاقىتقا دەيىنگى شابۋىلداردان يراك پەن ليەۆانت تەررورلىق توبىنىڭ 37 جەتەكشىسى قازا تاپقان. اۋە سوققىلارىنىڭ ءالى دە ارتا بەرەتىندىگى جانە لاڭكەستەرگە دەگەن امەريكالىق ستراتەگيانىڭ وزگەرىسسىز قالاتىنى جونىندە اق ءۇيدىڭ باسپا ءسوز حاتشىسى دجوش ەرنەست تە ناقتىلادى.
«ءىرى اۋە سوققىلارىنىڭ كوبىسى وتكەن اپتادا راككا قالاسىنىڭ ماڭىندا جاسالدى. بەلگىلى بولعانداي، يراك پەن ليەۆانت تەررورلىق توبىنىڭ بىرنەشە جەتەكشىسىنىڭ كوزى جويىلدى. سوندىقتان جاڭا مالىمدەمە سودىرلاردىڭ ودان ارعى ارەكەتىنە جاقسى بەلگى بولدى دەپ سانايمىز»،- دەيدى دجوش ەرنەست.
قازاقستان رەسپۋبليكاسىنىڭ سىرتقى ىستەر مينيسترلىگى:
«تاياۋ شىعىس پەن افريكاعا ويران سالعان لاڭكەستىك - جاھان جۇرتىنىڭ قابىرعاسىن قايىستىرعان ورتاق قايعى»، - دەپ ەسەپتەيدى. بۇگىن ەلىمىزدىڭ س ءى م كۋۆەيت، تۋنيس، مىسىر، نيگەريا سەكىلدى ەلدەردىڭ حالقىنا كوڭىل ايتتى. قازاقستان لاڭكەستىكتى ءتۇپ- تامىرىمەن جويۋ ءۇشىن دۇنيەجۇزىلىك قاۋىمداستىقتى ناقتى شارالار قولدانۋعا شاقىرادى. قازاقستاننىڭ بۇل ۇستانىمى بىرىككەن ۇلتتار ۇيىمىنىڭ وتىرىسىندا قارالادى دەپ كۇتىلۋدە.
www.khabar.kz
