ءيتتىڭ قاسقىردان قورقاتىنى تۋرالى اڭىز
قازاقى ورتادا قازاقى يتتەر مەن دۇرەگەي توبەتتەردىڭ ۇيالاستارىن اۋىزداندىرىپ قاسقىرعا سالاتىن بولعان. دەسە دە، قاسقىر الاتىن يتتەر نەكەن- ساياق.
مىنا ءبىر ەل اۋزىنداعى سوزدەردەن ءيتتىڭ قاسقىرعا توتەپ بەرۋىن اڭداۋعا بولادى: «اۋىل ءيتى الا بولسا دا، ءبورى كەلگەندە بىرىگەدى»، «ءبورىباسار كەتتى، ءبورى كەلىپ جەتتى»، «بولىنگەندى ءبورى جەر».
جاراتىلىسىندا قاسقىر مەن ءيت بىتىسپەس جاۋ. دەگەنمەن ءيت قاسقىردان ءالسىز، وعان كوپ باتا بەرمەيدى. ءيتتىڭ قاسقىردان قورقاتىنى جايىندا قازاقى ورتادا مىناداي اڭىز بار:
«ەرتەرەكتە بالاساعۇن قالاسىنا يەلىك ەتكەن ءبىر بيلەۋشىنىڭ بالاسىنىڭ تۇسىنە ۇنەمى قاسقىر كىرىپ، ونى قۋىپ جۇرەدى ەكەن. بالاسىنىڭ ءتۇسىن اكەسى بالگەرگە جورىتادى. سوندا بالگەر: «مارتەبەلى تاقسىر، ءسىزدىڭ بالاڭىزدى جەۋ ءۇشىن ءبىر سىرتتان قاسقىر كەلە جاتىر ەكەن. ول قاسقىردىڭ قانشىعى ءسىزدىڭ بالاڭىزدىڭ جۇرەگىنە جەرىك ەكەن» - دەپ ءتۇسىن جورىپ بەرەدى. بالگەردىڭ سوزىنە سەنبەگەن اكەسى اتاعى شىققان باسقا كورىپكەلدى الدىرىپ، وعان بالاسىنىڭ ءتۇسىن بايانداپ بەرەدى. بۇل كورىپكەل دە الدىڭعى بالگەر ايتقاندى قايتالاسا كەرەك. سوندا امالى تاۋسىلعان بالانىڭ اكەسى كورىپكەلگە «مەنىڭ بالامدى ولىمنەن قۇتقارۋدىڭ جولىن ايتساڭ، بار تىلەگىڭدى ورىندايمىن» دەيدى. سوندا بالگەر «وسى جەردەن ءتورت كۇندىك جەردە ءبىر كەدەيدىڭ سىرتتان ءيتى بار. ەگەر بالاڭىز ۇلگەرىپ جەتسە، سول ءيت قانا ونى ولىمنەن قۇتقارا الادى، بالاڭىزدى تەز ارادا اتتاندىرىڭىز» دەيدى. اكەسى سوزگە كەلمەستەن بالاسىن سايگۇلىككە مىنگىزىپ، اتتاندىرىپ جىبەرەدى.
بالا توقتاماستان شاۋىپ، ءۇشىنشى كۇن دەگەندە ارتىنان قاسقىر ءتۇسىپ باستىرمالاتا قۋادى. سايگۇلىك بولدىرىپ شابىسى باسەڭدەگەندە قاسقىر دا جەتىپ قالادى. سوندا الىستان ۇرگەن ءيتتىڭ داۋسى ەستىلەدى. ءيتتىڭ داۋسىنان سەسكەنگەن قاسقىر توقتاپ قالادى.
ءيتتىڭ داۋسى باسىلعان سوڭ قايتا قۋىپ، بالاعا قۋىپ جەتەدى دە اتتىڭ قۇيرىعىنان تىستەپ، تارتىپ توقتاتادى. وسى كەزدە الدىنان اقسارباس توبەت اتىپ شىعادى. ءيتتى كورگەن قاسقىر اتتى جىبەرە سالا، ورنىنان تاپجىلماي تۇرا قالادى. ءيتتىڭ سىرتتانى مەن قاسقىردىڭ ارلانى الىسا كەتەدى. ادامداردىڭ وقىس شىققان داۋىستارىنا ءيت قاراپ قالعاندا قاسقىر ونى جەلكەدەن باس سالادى. وسى كەزدە ءيتتىڭ يەسى جەتىپ، «قاپ، اتتەگەن- اي، بەكەر جاسادىڭ، ەندى يتتەرگە قاسقىر قوجالىق ەتەتىن بولدى» - دەپ بەلىندەگى كەزدىگىمەن قاسقىردىڭ قارنىن جارىپ ولتىرەدى. ءسويتىپ ءيت تە قاسقىر دا مەرت بولادى. مىنە وسىدان باستاپ ءيتتى بۇرىن تىستەپ باسىپ قالعان قاسقىر اتاۋلىدان ءيت قورقاتىن بولعان ەكەن».
