قازاقستاندا جول ءجۇرۋ ەرەجەسىنە وزگەرىستەر ەنگىزىلدى
وندا ارنايى بەلگىلەنگەن جەرلەردە عانا توقتاۋ كەرەك دەگەن تالاپ الىنىپ تاستالدى، سونداي- اق وزگەنىڭ كولىگىن باسقارۋ ءۇشىن وزىمەن بىرگە سەنىمحاتتىڭ بولۋى دا تالاپ ەتىلمەيدى.
وعان قوسا، ەندى سۋ جاڭا كولىكتەرگە 7 جىلعا دەيىن ارنايى تەحنيكالىق باقىلاۋدان ءوتۋدىڭ قاجەتى جوق دەپ حابارلايدى BNews.kz.
ۇكىمەتتىڭ 2015 -جىلعى 23 -ماۋسىمداعى قاۋلىسىنا سايكەس، كەيبىر كەلىسپەۋشىلىكتەر زاڭنان دا، جول ءجۇرۋ ەرەجەسىنەن دە الىنىپ تاستالدى.
اتاپ ايتقاندا، «جول ءجۇرىسى تۋرالى» زاڭىنىڭ 54-بابى 3-تارماعىنداعى مەحانيكالىق كولىك قۇرالىنىڭ يەسى مەن جۇرگىزۋشىسىنىڭ قۇقىقتارى مەن مىندەتتەرىنەن كولىك قۇرالىن ونىڭ يەسى بولماي باسقارعان جاعدايدا - ۋاقىتشا يەلەنۋگە جانە پايدالانۋعا بەرىلگەن كولىك قۇرالىن باسقاراتىن جەكە تۇلعانىڭ ۋاكىلەتتى ورگاندا مىندەتتى تىركەلۋىمەن بىرگە وسى كولىك قۇرالىن يەلەنۋ نەمەسە پايدالانۋ نەمەسە بيلىك ەتۋ قۇقىعىن راستايتىن قۇجاتتى ۇسىنۋ بويىنشا مىندەت الىنىپ تاستالدى.
بۇدان باسقا، زاڭنىڭ 54-باپتىڭ 22 -تارماقشاسىنان «ارنايى بولىنگەن، ءتيىستى جول بەلگىلەرىمەن جانە نۇسقاعىشتارمەن بەلگىلەنگەن ورىنداردان باسقا، ەلدى مەكەندەردىڭ جولدارىندا جانە كوشەلەرىندە» توقتاپ تۇرۋعا تىيىم سالاتىن نورما الىنىپ تاستالدى.
سونداي- اق مىندەتتى تەحنيكالىق تەكسەرۋدەن وتۋگە قاتىستى وزگەرىستەر ەنگىزىلدى. بۇدان بۇرىن اۆتوموبيل جاعدايىن تەكسەرۋ قاجەتتىلىگىنەن شىققان جىلىن قوسا العاندا، شىعارىلعانىنا ءتورت جىلدان اسپايتىن اۆتوكولىك يەلەرى بوساتىلعان بولاتىن.
زاڭناماداعى جاڭا وزگەرىستەرگە سايكەس بۇل مەرزىم اۆتوموبيل كولىگى سالاسىنداعى كاسىپكەرلىك قىزمەتتە پايدالانىلمايتىن م1 ساناتىنداعى كولىك قۇرالدارى (جولاۋشىلاردى تاسىمالداۋ ءۇشىن پايدالانىلاتىن جانە جۇرگىزۋشىنىڭ ورنىنان باسقا، سەگىزدەن اسپايتىن وتىراتىن ورنى بار كولىك قۇرالدارى) ءۇشىن جەتى جىلعا دەيىن ۇلعايتىلدى.
