قازىرگى اندەر «دىگىدىك، دىگىدىك شابامىن، بايدىڭ قىزىن الامىننىڭ» توڭىرەگىندە - بەكجان تۇرىس

استانا. قازاقپارات - قازاقستاننىڭ تانىمال اكتەرى بەكجان تۇرىس قازىرگى قازاق اۋەنىنە قاتىستى پىكىرىن ءبولىستى.

DalaNews.kz باسىلىمىنا بەرگەن سۇحباتىندا ونەرپاز قازىرگى كوپ جەردە ايتىلىپ جۇرگەندەردىڭ دەنى «ايعاي- شۋدان قۇرالعان جالعان پاتريوتيزم» ەكەنىن ايتىپ بەردى.

اكتەردىڭ ايتۋىنشا، ساحنادا جۇرگەندەردىڭ دەنى جاڭالىق ىزدەيمىز دەپ، جار جاعالاپ كەتەتىن كورىنەدى. «وزگەنىڭ قاڭسىعىن تاڭسىق كورۋگە بەيىلمىز. نە ىزدەسەك تە، جاڭالىقتى دا، جاقسىلىقتى دا، تاربيەنى دە، تاجىريبەنى دە ءوز تاريحىمىزدان، ءوز قۇندىلىعىمىزدان ىزدەۋىمىز كەرەك. ءبىز قازىر وزىمىزدەن ىزدەمەيمىز. وزىمىزدىكىنە الاكوزدەنە قاراپ، ەسكىرگەن دۇنيەنىڭ ساپىنا قوسا سالامىز»، - دەدى اكتەر ءتىلشىنىڭ تازا ونەر مەن حالتۋرانى اجىراتۋ جايىنداعى سۇراعىنا.

سونىمەن قاتار، بەكجان تۇرىستىڭ ايتۋىنشا، ءقازىر قۇلاقتان كىرىپ، بويدان تۇراق تاباتىن اۋەزدى اندەر جوقتىڭ قاسى. «ءداستۇرلى اندەرىمىزدى ءبىز ءالى دە دارىپتەي الماي ءجۇرمىز. ءبىزدىڭ نەبىر بۇلبۇل كومەي، جەزتاڭداي انشىلەرىمىز بار. ەندى ءاننىڭ ءوزى امانات قوي. سونىڭ امان-ساۋ قالپىندا جەتكىزىلۋى ءلازىم. سول اماناتقا وبال جاساماي، سالاۋاتقا ساۋاپ جاساماي، ءبۇتىن قالپىندا جەتكىزۋ - بۇگىنگى انشىلەردىڭ مىندەتى. قازىرگى اندەر «دىگىدىك، دىگىدىك شابامىن، بايدىڭ قىزىن الامىننىڭ» توڭىرەگىندە»، - دەدى ول.

ونەرپازدىڭ ايتۋىنشا، بۇعان حاس ونەردىڭ قادىرىن شوۋعا تولى باعدارلامالار جاسايتىندار كەتىرىپ ءبىتتى. ەستراداشىلاردىڭ ايعايىنا قۇلاق تۇنادى. ولار ەشكىمدى ەلەمەيدى. ءداستۇرلى انشىلەر مەن ەستراداشىلار ءبىرىن ءبىرى جامانداۋدان اسپاي ءجۇر. بىزگە داۋ-داماي قۋىپ، ونبەس ءىستىڭ سوڭىن قۋاتىن ۋاقىت جوق. باعلان ونەردىڭ باسىن تورگە سۇيرەيتىن شىن ونەرپازدار ءوزارا بىرىگىپ، ۇلت بولمىسىنا زيان كەلتىرەر ىستەرمەن كۇرەسۋدى ۇيرەنگەنى ابزال- اق»، - دەدى بەكجان تۇرىس.