شارۋالار تۇيە ءوسىرىپ، دەمالۋشىلاردى شۇباتپەن قارسى الۋدا

استانا. قازاقپارات - سولتۇستىك قازاقستان وبلىسى ايىرتاۋ اۋىلىنىڭ تۇرعىنى جاڭاباي ءپىرمانوۆ تۇيە ءوسىرىپ، كۋرورتتىق ايماققا كەلەتىن دەمالۋشىلاردى شۇباتپەن قارسى الادى.

شارۋا سەرىكتەرىمەن بىرگە دالاعا اقشاڭقان كيىز ءۇي تىگىپ، قوناقتارعا قازاقتىڭ ۇلتتىق تاعامدارىن ۇسىنىپ، داستارقان جايادى.

ىسكەر ازاماتتار ەندى اشىق اسپان استىندا ەتنواۋىل اشۋدى جوسپارلاپ وتىر.

جاڭاباي ءپىرمانوۆ 1996 -جىلى اۋلەتىمەن بىرگە وزبەكستاننان قازاقستانعا قونىس اۋدارادى. ءشوبى شۇيگىن، سۋى مول ايىرتاۋ اۋىلىنا تۇراقتاعان ولار ايماقتا العاشقىلاردىڭ ءبىرى بولىپ تۇيە ۇستاپ، شارۋاشىلىق اشتى.

بۇگىندە وسى مالدىڭ ارقاسىندا اياقتارىنان تۇرىپ، جىراقتا جۇرگەن جاقىندارىن كوشىرىپ الدى. تۇيە شارۋاشىلىعى ءپىرمانوۆتاردىڭ وتباسىلىق كاسىبىنە اينالدى. بۇگىندە ولار 50 شاقتى تۇيە ۇستايدى. وركەشتىلەردى وزدەرى باعىپ، وزدەرى ساۋادى. ءجۇنى دە، شۇباتى دا كادەگە جاراپ تۇر. شۇبات -  شيپالى دا قۇنارلى سۋسىن.

جاڭاباي ءپىرمانوۆ سەرىكتەرىمەن بىرگە كيىز ءۇي تىگىپ، شالقار كولىنە كەلەتىن تۋريستەردى قارسى الادى. جول- جونەكەي سوققاندار قازاقتىڭ ۇلتتىق تاعامدارىنان ءدام تاتىپ قانا قويماي، تاريحىمەن دە تانىسادى. ەتنواۋىلدىڭ باستى ماقساتى دا وسى بولىپ وتىر.

قۇسايىن جىلقىشيەۆ، تاريحشى:

- تاريحي ورىندار بىزدە كوپ. مىسالى، قاراساي- اعىنتاي باتىردىڭ كەسەنەسى بار. ەكىنشىدەن، شوقان ءۋاليحانوۆتىڭ مۇراجايى بار. ونىڭ اجەسى ايعانىمنىڭ تۇراعى بار. جان-جاعىمىز تۇنىپ تۇرعان تاريح. الدىمىزدا سونى كەڭىنەن ناسيحاتتاۋ ماقساتى تۇر.

جاڭاباي ءپىرمانوۆ ايىر وركەشتى ىنگەن مەن ءبىر وركەشتى ارۋانا تۇيەلەرىن وسىرەدى. ەندى شارۋا وسى ەكەۋىن قوسىپ، نار تۇقىمىن جاڭارتىپ جاتىر.

www.24.kz