فرانسيا ەلشىسى الماتى وبلىسىنا ساپارىندا شارىن شاتقالى، كولساي كولىن تاماشالادى
وبلىس باسشىسى قوناقتارعا الماتى وبلىسىنىڭ الەۋمەتتىك- ەكونوميكالىق دامۋى، تابيعي رەسۋرستارى مەن ينۆەستيتسيالىق مۇمكىندىكتەرى تۋرالى بايانداپ بەردى.
وبلىس اۋماعىندا قازاقستان- فرانسيا بىرلەسكەن كاسىپورىندارىنىڭ تىندىرىمدى جۇمىس ىستەپ جاتقانىن اتاپ ءوتتى. ەلباسىنىڭ باستاماسىمەن قولعا الىنىپ وتىرعان ىرگەلى جوبالار مەن باعدارلامالار جايىندا تىلگە تيەك ەتتى.
فرانسيا ەلشىسى ءوز سوزىندە فرانسۋزدىق كاسىپكەرلەر سوناۋ 1991 -جىلدان بەرى قازاقستاندا بيزنەس جوبالارىن ءساتتى جۇزەگە اسىرىپ جاتقاندارىن ايتتى. جۋىردا ەلشى «Danon» كاسىپورنىندا بولىپ قايتقان.
سوندىقتان، ەلشى مىرزا وسى باعىتتا بىرلەسكەن جوبالاردى قولعا الۋعا مۇددەلەستىك ءبىلدىردى. سول سياقتى جىلقى ەتىنىڭ ەكسپورتىن ارتتىرۋعا، بايگەگە شاباتىن اسىل تۇقىمدى جىلقىلار سانىن كوبەيتۋگە دە اتسالىسا الاتىندارىن ايتتى. سونىمەن قاتار جاقىن ارادا پاريج - استانا باعىتىندا اۋە رەيسى اشىلعانىن جانە فرانسيالىق- قازاقستاندىق كاسىپكەرلىك پالاتاسىن قۇرۋ تۋرالى جوسپاردىڭ دا جۇزەگە اسىرىلاتىنىن قۋانا جەتكىزدى.
كەزدەسۋ قورىتىندىسىندا وبلىس اكىمى اماندىق باتالوۆ وبلىستىڭ ينۆەستيتسيالىق مۇمكىندىكتەرى قاي سالادا بولسىن جەتكىلىكتى ەكەندىگىن، الداعى ۋاقىتتا بىرلەسىپ جۇمىس ىستەۋگە دايىن ەكەندىگىن ايتتى.
ءوڭىر باسشىسى فرانسيا ەلشىسىنە سامۇرىق قۇس بەينەلەنگەن ەستەلىك سىيلىق، سول سياقتى ەلشىنىڭ جۇبايى دجەين ەتەن مەن اۋدارماشى راۋشان اشيمبايەۆاعا دا ەستەلىك سىيلىقتار تابىس ەتتى.
جالپى فرانسيا ەلشىسى فرانسيس ەتەننىڭ الماتى وبلىسىنا جاساعان ساپارىندا مۇنان سوڭ الماتى وبلىستىق كاسىپكەرلەر پالاتاسىندا كاسىپكەرلەرمەن كەزدەسىپ، ودان ءارى تالدىقورعان قالاسىنىڭ كورنەكتى ورىندارىندا بولادى، پانفيلوۆ اۋدانىنداعى «قورعاس - شىعىس قاقپاسى» جوباسى مەن «قۇرعاق پورت» قۇرىلىسىمەن تانىسىپ، شارىن شاتقالى، كولساي كولدەرى سەكىلدى ءتۋريزمنىڭ تاپتىرماس جاۋھارلارىن ءوز كوزىمەن كورىپ قايتادى دەپ جوسپارلانىپ وتىر.
ايتا كەتۋ كەرەك، الماتى وبلىسىندا فرانسيالىق «سۋففلە» كومپانياسىنىڭ «سۋففلە قازاقستان اشىتقى زاۋىتى»، «دانون» برەندىمەن ءسۇت تاعامدارىن وندىرەتىن «دانون بەركۋت» ج ش س جۇمىس ىستەۋدە. سول سياقتى «قاينار ا ك ب» اككۋمۋلياتور زاۋىتى فرانسۋزدىق «Soitec» كومپانياسىمەن بىرلەسىپ، زاۋىت بازاسىندا «كۇن ەلەكتر ستانساسىنىڭ قۇرىلىسى جانە كۇن مودۋلدەرىن ءوندىرۋ» جوباسىن قولعا الماقشى.
