قىتايدىڭ ورتالىق تەلەۆيدەنيەسىنەن ن. نازاربايەۆ تۋرالى فيلم كورسەتىلدى

استانا. قازاقپارات - ق ح ر- داعى قازاقستان ەلشىلىگىنىڭ باستاماسىمەن 6 -شىلدەدە پرايم تايم ۋاقىتتا قىتايدىڭ ورتالىق تەلەۆيدەنيەسى بويىنشا 6-CCTV ارناسىندا ق ر پرەزيدەنتى نۇرسۇلتان نازاربايەۆ تۋرالى «ەلباسى جولى» - «تىعىرىقتان جول تاپقان» كوركەم فيلمى كورسەتىلدى، دەپ حابارلايدى ق ر س ءى م باسپا ءسوز قىزمەتىنەن.

كينوكارتينانى «قازاق فيلم» كينوستۋدياسىمەن كەلىسىم بويىنشا قىتاي تىلىنە دەرەكتى جانە عىلىمي- تانىمال فيلمدەردى وندىرەتىن ەلدەگى ءىرى «Zhongyang xinying jituan» كومپانياسى اۋداردى. دۋبلياج رەجيسسەرى ق ح ر ۇزدىك دىبىس رەجيسسەرلارىنىڭ بەستىگىنە كىرگەن چۋي ۋەي جۋن (Qu Weijun) بولدى.

 قىتاي كورەرمەندەرىنە فيلمنىڭ نەگىزگى يدەياسىن - جاستاردىڭ بويىندا ماقساتقا ۇمتىلۋدى، جاۋاپكەرشىلىك پەن پاتريوتتىق سەزىمدى بارىنشا جەتكىزۋ جانە فيلمنىڭ باستى كەيىپكەرلەرىن دىبىستاۋ ءۇشىن قىتايدىڭ تسزيا سياوتسزيۋن، شان حۋن ءتارىزدى تانىمال اكتەرلەرى شاقىرىلدى.

بۇدان بۇرىن «بالالىق شاعىمنىڭ اسپانى» فيلمى قىتايلىق كورەرمەنگە 2013 -جىلى قازاقستان كينوسى اپتالىعى اياسىندا كورسەتىلگەن بولاتىن. تاياۋدا قىتايلىق تەلەۆيدەنيەدەن فيلم- ەپوپەيانىڭ بارلىق بولىمدەرى كورسەتىلمەك.