قىتايدىڭ ساراپشىلار قاۋىمى قازاقستاندى مەرەكەلەرىمەن قۇتتىقتادى - فوتو

بەيجىڭ. قازاقپارات - ق ح ر ديپلوماتتارى، عالىمدارى مەن جۋرناليستەرى قازاقستاندى استانا كۇنىمەن جانە ق ر پرەزيدەنتى نۇرسۇلتان نازاربايەۆتىڭ تۋعان كۇنىمەن قۇتتىقتادى.

قازاقپارات تىلشىسىنە بەرگەن سۇحباتتارىندا ولار ءبىزدىڭ ەلىمىزدىڭ تاۋەلسىزدىك جىلدارىنداعى دامۋى تۋرالى ويلارىمەن ءبولىسىپ، قازاقستان حالقىنا جانە مەملەكەت باسشىسىنا دەگەن ىزگى تىلەكتەرىن جەتكىزدى.

«ق ر پرەزيدەنتى ن. نازاربايەۆتىڭ دانالىعىنىڭ ارقاسىندا قىتاي مەن قازاقستاننىڭ قارىم-قاتىناستارى جىلدام دامىپ كەلە جاتىر، ءارى ول جالپى قامتيتىن ستراتەگيالىق ارىپتەستىك سيپاتىنا يە. تاۋەلسىزدىك جىلدارى ەلدەرىڭىز قازىر «ءبىر بەلدەۋ، ءبىر جول» جوباسىن جۇزەگە اسىرۋدا نەگىزگى بولىپ تابىلاتىن قۋاتتى مەملەكەتكە اينالدى.

ءبىز ن. نازاربايەۆ ۇسىنعان «قازاقستان-2050» ستراتەگياسى مەن «نۇرلى جول» جاڭا ساياسات باعدارلاماسىن اسا جوعارى باعالايمىز. كوپ ۇلتتى قازاقستاندى جانە ەل باسشىسىن مەرەكەلەرىمەن قۇتتىقتايمىز»، - دەدى قىتايدىڭ شەتەلدەرمەن دوستىق قوعامىنىڭ ءتوراعاسىنىڭ ورىنباسارى سۋڭ جينۋ (Song Jingwu).

«قازاقستان قىتايدىڭ ماڭىزدى كورشىسى ءارى ستراتەگيالىق ارىپتەسى. ەلدەرىڭىز جىلدام دامىپ كەلە جاتىر. جاس ەلوردالارىڭىز استانا ادەمىلىگىمەن تامساندىرادى. ق ر پرەزيدەنتى ن. نازاربايەۆ كورەگەن ساياساتىنىڭ ارقاسىندا قازاقستاندى جارقىن بولاشاققا جەتەلەپ كەلەدى. ءبىز قازاقستاننىڭ دامۋ پەرسپەكتيۆالارى زور ەكەنىنە سەنىمدىمىز. قازاقستان حالقىن مەرەكەلەرىمەن قۇتتىقتايمىن، ن. نازاربايەۆقا مىقتى دەنساۋلىق، ۇزاق عۇمىر تىلەيمىن»، - دەدى ق ح ر س ءى م شىعىس ەۋروپا جانە ورتالىق ازيا ەلدەرى دەپارتامەنتىنىڭ كەڭەسشىسى، شاڭحاي ىنتىماقتاستىق ۇيىمىنىڭ تاتۋ كورشىلىك، دوستىق جانە ىنتىماقتاستىق كوميتەتى حاتشىسىنىڭ ورىنباسارى جياڭ نا (Jiang Na).

ال قىتاي قازىرگى زامانعى حالىقارالىق قاتىناستار اكادەمياسىنىڭ ورتالىق ازيا ءبولىمىنىڭ مەڭگەرۋشىسى ديڭ شياۋ شيڭ: «نۇرسۇلتان نازاربايەۆتىڭ باسشىلىعىمەن قازاقستان ايماقتىق دەرجاۆاعا اينالدى. مەملەكەت باسشىلارىڭىزعا مىقتى دەنساۋلىق، تولاعاي تابىس تىلەيمىن. ال جاس تا بولسا باس قالاعا اينالعان استانا ءوسىپ-وركەندەي بەرسىن!»، - دەپ ىستىق لەبىزىن ءبىلدىردى.

«ءوز ساباقتارىمدا قىتاي ستۋدەنتتەرىنەن قازاقستاندا قانشا ەتنوس تۇرىپ جاتقانىن بىلەسىڭدەر مە دەپ سۇرايمىن. ءسويتىپ، 130 دان استام ۇلت تۇراتىن ەلدە بەيبىتشىلىك پەن كەلىسىمدى ساقتاۋ قازاقستان باسشىلىعىنىڭ ءتيىمدى ۇلتارالىق جانە الەۋمەتتىك-ەكونوميكالىق ساياساتىنىڭ دالەلى ەكەنىن تۇسىندىرەمىن. ءارى، ەل پرەزيدەنتى ن. نازاربايەۆ پەن ق ر ۇكىمەتى مەملەكەتتى دامىتۋدىڭ ۇزاق مەرزىمدى جوسپارىن باسشىلىققا الا وتىرىپ ارەكەت ەتەتىنىن اتاپ وتەمىن. ال استانا ءسوزسىز، قازاقستاننىڭ تاماشا بولاشاعىنىڭ سيمۆولى»، - دەدى قىتاي حالىق ۋنيۆەرسيتەتىنىڭ رەسەي، شىعىس ەۋروپا جانە ورتالىق ازيا ينستيتۋتىنىڭ ديرەكتورىنىڭ ورىنباسارى، وسى ج و و جانىنداعى حالىقارالىق ەنەرگەتيكالىق جانە ەكولوگيالىق ستراتەگيالار زەرتتەۋ ورتالىعىنىڭ مەڭگەرۋشىسى پروفەسسور حۋ شينحۋا (Xu Qinhua).

قىتايدىڭ Southern Weekly (Nanfang Zhoumo) اپتالىعىنىڭ ەكونوميكالىق شولۋشىسى ۋ مەنتسي (Wu Mengqi) سىزدەردىڭ پرەزيدەنتتەرىڭىز الەمگە ايگىلى ساياسي قايراتكەر، ول بولىپ جاتقان الەۋمەتتىك-ەكونوميكالىق ماسەلەلەردى كورەگەندىلىكپەن باقىلاپ، سىرتقى جانە ىشكى ساياساتتى ساۋاتتى جۇرگىزە بىلەدى. قازاقستان جاقىندا دۇنيەجۇزىلىك ساۋدا ۇيىمىنا كىردى، بۇل ونىڭ الەمدىك ەكونوميكالىق جۇيەگە قادام باسۋىنىڭ تاماشا قادامى. مەن نۇرسۇلتان نازاربايەۆ پەن قازاقستان حالقىن وسىناۋ مەرەكەلەرىمەن قۇتتىقتايمىن»، - دەپ لەبىزىن جەتكىزدى.