ءۇندىستان پرەمەر-ءمينيسترى تۆيتتەرگە قازاقشا جازدى

استانا. قازاقپارات - قازاقستانعا مەملەكەتتىك ءىس-ساپارمەن كەلگەن ءۇندىستان پرەمەر- ءمينيسترى نارەندرا مودي تۆيتتەردە قازاقشا جازدى.

ءبىرىنشى تۆيتتى ول استاناعا قونعان كەزدە بىردەن جازعان.

«ءۇندىستاننىڭ ورتالىق ازياداعى سەنىمدى دوسى - قازاقستانعا كەلگەنىمە وتە قۋانىشتىمىن»، - دەپ جازدى ول.

ەكىنشى تۆيتتە ول قازاقستان پرەمەر-ءمينيسترى كارىم ماسىموۆپەن بىرگە تۇسكەن فوتوسۋرەت سالعان بولاتىن.

نارەندرا مودي وندا: «پرەمەر-مينيستر كارىم ءماسىموۆ، ىستىق ىقىلاسپەن قارسى العانىڭىزعا العىسىمدى بىلدىرەمىن»، - دەگەن جازۋ قالدىرعان.

ايتا كەتەيىك، ونىڭ وقىرماندارى 13,5 ميلليونعا جەتىپ وتىر.

استانادا قازاقستان پرەمەر-ءمينيسترى كارىم ءماسىموۆ پەن ەلىمىزگە رەسمي ساپارمەن كەلگەن ءۇندىستاننىڭ ۇكىمەت باسشىسى نارەندرا موديدىڭ قاتىسۋىمەن قازاقستان- ءۇندىستان بيزنەس- فورۋمى ءوتتى.

بيزنەس- فورۋم بارىسىندا قازاقستان مەن ءۇندىستاننىڭ ساۋدا- ەكونوميكالىق، ينۆەستيتسيالىق قارىم- قاتىناستارىنىڭ جول كارتاسى جاسالدى. وعان جالپى 30 عا تارتا بىرلەسكەن جوبا ەنىپ وتىر. سونىمەن قاتار، قازاقستان مەن ءۇندىستان كاسىپكەرلەرى مەن ءىرى كومپانيالارى اراسىندا 12 كەلىسىم شارتقا قول قويىلدى.

اۆتور: جاسۇلان جولدىبايەۆ