قازاقستاندىق بارلاۋشىلار ۇزدىك اتاندى - فوتو
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.
بەلارۋس، قىتاي، رەسەي، امەريكا قۇراما شتاتتارى جانە قازاقستان ەلدەرىنەن كەلگەن بارلاۋشىلار بەس كۇن بويى ارنايى ماقساتتاعى تاڭداۋلى بولىمشەلەردىڭ ءىس-قيمىل ماشىقتارىن كورسەتتى.
قاتىسۋشىلار ونداعان شاقىرىم جەردەن ءوتۋ، كۇندىزگى جانە تۇنگى ۋاقىتتا اۋىسا وتىرىپ قولايسىز جاعدايدا ءتۇرلى نىسانالاردى اتۋ، مەديتسينالىق جانە تاۋ دايارلىعى، كەدەرگى سىزىقتارىن يگەرۋ، 30 شاقىرىمعا شەرۋ جاساۋ، شىم-شىتىرىق قيىلىسقان جەرلەردى باعدارلاۋ، جاساندى قوپارعىش مينا ءىسى جانە باسقا دا ارنايى ءىس-شارالاردى ورىندادى.
قاجىرلى جانە قىزۋ كۇرەستە قاتىسۋشىلار وزدەرىنىڭ ءالسىز جانە پارمەندى تۇستارىن ايقىنداپ قانا قويماي، سونىمەن قوسا ارنايى وپەراتسيالاردى، ارنايى ماقساتتاعى بارلاۋ توپتارىنىڭ جاۋىنگەرلىك ادىستەمەلىك دايارلىعىن جۇرگىزۋدە تاجىريبە الماسىپ، دوستار تاپتى.
«مەنىڭ ويىمشا ءبىزدىڭ توپ ەڭ تاجىريبەلى توپ. ولار تۇتاستاي تاياۋ شىعىستاعى جانە اۋعانستانداعى وپەراتسيالارعا قاتىستى. ءبىز ءۇشىن ەڭ كۇردەلىسى تاكتيكا بولاتىن. دايارلىق بىزدە مۇلدە باسقاشا ەكەن. دەگەنمەن سايىس ماقساتى تاجىريبە الماسۋ بولىپ وتىر. سوندىقتان دا ءبىز بۇل جەردە كوپ دوستار تاپتىق» - دەپ ا ق ش «جاسىل بەرەتتەر» توبىنداعى جاۋىنگەرلەرىنىڭ ءبىرى مايكل براۋن اتاپ ءوتتى. سايىستىڭ قورىتىندىسى بويىنشا قورعانىس مينيسترلىگىنىڭ باسشىلىعى جەڭىمپازدارعا جۇلدەلەر مەن سىيلىقتار تابىس ەتتى. «التىن ۇكى-2015» سايىسىنىڭ التىن كۋبوگىن قازاقستاندىق ارنايى ماقساتتاعى بولىمشەلەر جەڭىپ الدى، كۇمىس جۇلدە - كۇن استى ەلىنىڭ جاۋىنگەرلەرىنە بۇيىردى.
سونىمەن قاتار قىتايلىق اسكەري قىزمەتشىلەر «ۇزدىك مەرگەن جۇپ» نوميناتسياسى بويىنشا جەڭىسكە جەتتى. ءۇشىنشى ورىندى ەكى توپ يەلەندى، ولار - رەسەي فەدەراتسياسى مەن بەلورۋس رەسپۋبليكاسىنىڭ دەسانتشىلارى. «جەڭىسكە دەگەن جىگەرلىگى ءۇشىن» گراموتاسىمەن جارالى اياعىمەن سوقپاق جولدان وتكەن بەلورۋستىق اسكەري قىزمەتشىسى ناگرادتالدى.
ال امەريكالىق «جاسىل بەرەتتەر» توبى «ۇزدىك قوپارعىشتار» نوميناتسياسىن جەڭىپ الىپ، توپ بويىنشا «جەڭىسكە دەگەن جىگەرلىگى ءۇشىن» گراموتاسىن يەلەندى. ولار جاساندى قوپارعىش ميناسى جانە 10 شاقىرىمدىق شەرۋ جاساۋ بويىنشا كەزەڭدەردىڭ بىرىندە ءوز شەبەرلىكتەرى مەن جەڭىسكە دەگەن قۇلشىنىسىن كورسەتتى.
قاتىسۋشىلاردىڭ كوزقاراسى بويىنشا جارىس ايتارلىقتاي كۇردەلى بولدى. ءار كەزەڭ شىدامدىلىقتىڭ، كۇشتىڭ، توپپەن ساپالى جۇمىس جاساۋدىڭ جوعارى دەڭگەيىن جانە ءار قاتىسۋشىنىڭ بابىنداعى دايارلىعىن تالاپ ەتتى. ءار كوماندا ءۇشىن اۋا رايى ەرەكشە ماڭىزدى سانالدى. قاپىرىق كۇن جانە قۇرعاق كليمات ءتىپتى ەڭ تاجىريبەلى جانە مىقتى دەگەن ارنايى ماقساتتاعىلاردىڭ جوسپارىنا بىرنەشە مارتە كەدەرگى بولدى.
