ون بالانىڭ اكەسى نازاربايەۆتىڭ تۋعان كۇنىنە سىي جاسادى

پورتالدىڭ مالىمەتىنشە، پاۆلوداردا ەرتىس اۋدانىنىڭ 75 جاستاعى تۇرعىنى زاحان ءابىلقاس توپ بايگەگە قاتىسىپ، 14 شاقىرىمدىق شابىسىن پرەزيدەنتكە ارنادى.

«10 بالانىڭ اكەسى زاحان ءابىلقاس 2000 -جىلداردىڭ باسىندا قازاقستانعا موڭعوليادان قونىس اۋدارعان. سول ەلدە 40 جىلعا جۋىق شاحتەر بولىپ ەڭبەك ەتكەن. ال ۇلتتىق ات سپورتىنىڭ تۇرلەرىن 50 جىل بويى سەرىك ەتىپ ءجۇر»، - دەلىنگەن جاريالانىمدا.

اقساقالدىڭ ايتۋىنشا، ول تەمىر تۇلپارلاردى ۇناتپايدى. «جىلقىعا دەگەن سۇيىسپەنشىلىگىم بولەك. تۋعان-تۋىسقاندارىما قوناققا بارعاندا سالت اتپەن بارعاندى قالايمىن»، - دەيدى ول.

ايتا كەتەيىك، ءابىلقاس پاۆلوداردا استانا كۇنىنە وراي وتكەن بايگەگە كوككوز ەسىمدى سايگۇلىگىمەن قاتىسىپ، 14 شاقىرىمدىق جولدى شاۋىپ ءوتىپ، ىنتالاندىرۋ سىيلىعىنا يە بولدى.