جاس اقىندار جاۋھار جىرلارىن استاناعا ارنادى

استانا. قازاقپارات - استانا كۇنىن مەرەكەلەۋ ءىس-شارالارى كەڭ اۋقىمدا ءوتتى. ەلوردا تۇرعىندارى مەن قوناقتارى قالانىڭ ءاربىر ساياباعىندا، مادەني ۇجىمداردا بولىپ جاتقان قىزىقتى مەرەكەلىك دۋمانداردى تاماشالاۋ مۇمكىندىگىنە يە بولدى.

وسى مەرەكە اياسىندا استانا قالاسىنداعى ۇلتتىق اكادەميالىق كىتاپحانا ءبىرقاتار ءىس-شارالار ۇيىمداستىردى. سونىڭ ءبىرى اقىنداردىڭ استاناعا ارنالعان جىرلارىن جاريا ەتۋىنە ۇلاستى.

كەش شىمىلدىعىن بەلگىلى اقىن باقىتجان توباياقوۆ اشىپ، ءوز ولەڭىن وقىپ بەردى. كەلەسى كەزەكتە ءسارۋار قامايەۆا، ايباتىر سەيتاق، اسەم ەرەجە قىزى، اۋىت مۇحيبەك، گۇلىسحان دومالاي قىزى جىردان شاشۋ شاشتى.

سونداي-اق وسى كەشتە استاناداعى جوعارى وقۋ ورنىندا وقىپ جۇرگەن جانە جۋىردا ەلورداعا قونىس اۋدارعان جاس اقىنداردىڭ ساحناعا شىعىپ، وزدەرىنىڭ تىرناقالدى تۋىندىلارىمەن تانىستىرعانىن ايتا كەتكەنىمىز ءجون. ايدانا سەگىزبايەۆا، ءالىمجان الىشەر، كەنجەبەك سەرجان ۇلى، سايان ەسجان ماحاببات، جاستىق شاق، اققۋ تۋرالى ولەڭدەرىن وقىدى. جىرلارىندا وي مەن كوركەمدىك، تىڭ ىزدەنۋشىلىك بارى قۋانتتى.

وسى جىر كەشىندە جاس ونەر يەسى ازامات ابدىراحيەۆ ءوزىنىڭ «جاۋىن» اتتى ءانىن العاش رەت ورىندادى. سونىمەن بىرگە گۇلنازيا بيسەنوۆا دا اننەن شاشۋ شاشىپ، ءسوزى مەن سازىن ءوزى جازعان «ءومىرىمنىڭ ءمانى» ءانىن شىرقادى.

كىتاپحانانىڭ 6 جاسار وقىرمانى گۇلنازىم ولەڭدى مانەرلەپ وقىپ بەردى.

ادەبي-سازدى كەشتى جۇرگىزگەن اقىندار مارجان ەرشۋ مەن ەرلان ءجۇنىس تە ءوز ولەڭدەرىن تىڭدارمان نازارىنا ۇسىندى.

اۆتور: ايدىن بايمەن