شەتەلدىك ب ا ق قازاق تەننيسىنىڭ قارقىنىنا تامساندى
ازاتتىق قازاق تەننيسىنىڭ دامۋ قارقىنىنا تاڭقالعان شەتەلدىك ب ا ق- تارعا شولۋ جاسادى.
الەمدەگى ەڭ ءىرى تەننيس دودالارىنىڭ ءبىرى سانالاتىن ۇلى بريتانياداعى ۋيمبلدون تۋرنيرىندە قازاقستان تەننيسشىلەرى ەشكىم كۇتپەگەن جەتىستىككە جەتتى. زارينا دياس الەمنىڭ 14-راكەتكاسى سانالاتىن اندرەا پەتكوۆيچتى جەڭىپ، ۋيمبلدوننىڭ ءتورتىنشى كەزەڭىنە ءوتتى. ەندى ول ۋيمبلدوننىڭ 2004-جىلعى چەمپيونى، رەسەي سپورتشىسى ماريا شاراپوۆامەن كەزدەسەدى.
قازاقستاننىڭ جانە ءبىر تەننيسشىسى يۋليا پۋتينتسيەۆا ەكىنشى راۋندتا الەمنىڭ 16-راكەتكاسى، امەريكالىق سپورتشى ۆەنۋس ۋيليامسقا 7-6, 6-4 ەسەبىمەن جول بەردى. قازاق تەننيسشىسىمەن اراداعى ماتچتان سوڭ BBC اگەنتتىگىنە بەرگەن سۇحباتىندا ۋيليامس: «ماتچ بىتپەي قويدى. قانداي سوققى جاساسام دا، ول جىلدام قارىمتا جاساپ وتىردى» دەگەن.
اۆتوردىڭ پايىمىنا جۇگىنسەك، قازاقستاننىڭ سۋىرىلىپ العا شىعۋى وسىدان جەتى جىل بۇرىن سپورتتىڭ بۇل تۇرىنە سالىنعان ينۆەستيتسيانىڭ ارقاسى ەكەن.
سونىڭ ناتيجەسىندە قازاقستان «ءوز اۋماعىندا تۋعان ويىنشىلارىنسىز-اق الەمنىڭ ەليتالىق دەۆيس كۋبوگىنا كىرىپ، ودان تۇراقتى ورىن الدى».
«دەگەنمەن، ينۆەستيتسيانىڭ ەلدىڭ ءوز ىشىنەن سالىنعانى انىق. ينۆەستور - Forbes جۋرنالىنىڭ الەمدەگى ەڭ باي دەگەن 800 ادامنىڭ تىزىمىنە ەنەتىن، تەننيسكە قۇمارتاتىن ءارى 1,32 ميلليارد فۋنت ستەرلينگىن قايدا جۇمساۋدى بىلمەي جۇرگەن قازاقستاندىق بانكير بولات وتەمۇراتوۆ» دەپ جازادى بريتان باسىلىمى.
«رەسەيلىكتەر ميحايل كۋكۋشكيندى، اندرەي گولۋبيەۆتى، ەۆگەني كوروليەۆتى، يۋري شۋكيندى، بولگاريالىق سەسيليا كاراتانشيەۆانى «شەتەلدەن يمپورتتاپ» جۇرگەندە، ۋيمبلدونداعى ۇكىلى ءۇمىت - 21 جاستاعى زارينا دياستىڭ جارق ەتىپ كورىنۋى ەلدى قانشالىق مارقايتىپ تاستاعانىن باجايلاۋعا بولادى» دەيدى ماقالا اۆتورى.
Independent باسىلىمىنىڭ جازۋىنشا، ءاۋ باستا قازاقستان تەننيس فەدەراتسياسى زارينا دياسقا اسا ءمان بەرە قويماعان.
دەگەنمەن، يتاليالىق فيتنەس- باپكەر ستەفانو بارالدو مەن قىتايلىق وليمپيادالىق تەننيس باپكەرى الان مانىڭ ارقاسىندا زارينا دياس وسىنداي ايرىقشا جەتىستىككە جەتكەن.
«الماتىدان كەتىپ، قىتايدا جاتتىعا باستاعاندا زارينا دياس الەمدىك رەيتينگتە 230-ورىندا تۇرعان. بىلتىر اۆستراليادا وتكەن اشىق چەمپيوناتقا دەيىن ول ۇلكەن شلەم تۋرنيرلەرىنە ىلىگە الماي ءجۇردى. دەسە دە، مەلبۋرنداعى ءۇشىنشى راۋندى ونىڭ سۋىرىلىپ العا شىعۋىنىڭ باسى بولدى. سودان سوڭ ۋيمبلدونداعى ءتورتىنشى راۋند ويىندارى باستالدى.
ول الەمدەگى ەڭ مىقتى ءجۇز راكەتكانىڭ تىزىمىنە ەنىپ، جوعارى قاراي ورلەپ كەلەدى. ۋيمبلدوندا اتى دۇنيەگە جايىلىپ، الەمدە 34-ورىنعا شىققالى بەرى وتانداستارى وعان نازار سالا باستادى» دەپ جازدى Independent باسىلىمى.
ەرلەر اراسىندا قازاقستاندىق ميحايل كۋكۋشكيننىڭ ەسىمى ەرەكشە اتالدى. ول ءبىرىنشى راۋندتا الەمنىڭ ءۇشىنشى راكەتكاسى سانالاتىن بريتاندىق ەندي مەررەيدەن 6-4, 7-6 (7-3) ، 6-4 ەسەبىمەن جەڭىلدى.
ماتچتان سوڭ BBC- گە سۇحبات بەرگەن مەررەي ويىننىڭ وتە اۋىر بولعانىن ايتتى. ۋيمبلدوننىڭ ءۇش دۇركىن چەمپيونى، كەزىندە الەمنىڭ ءبىرىنشى راكەتكاسى اتالعان امەريكالىق دجون ماكينروي: «كۋكۋشكين وتە مىقتى قارسىلاس بولدى. ونىڭ سوققىسى وتە قاتتى، فلەت- بول بولدى. مەررەيدىكى قيىس كەتىپ، كۋكۋشكينگە مۇمكىندىك بەرىپ جاتتى» دەگەن.
ۇلى بريتانيانىڭ Independent گازەتى زارينا دياستىڭ تاڭقالارلىق جەتىستىگىن، قازاقستان تەننيسىندەگى جالپى احۋالدى تالداپ جازدى.
«بۇرىنعى سوۆەت وداعىنىڭ الىس تۇكپىرىندە، قىتايمەن شەكارادا جاتقان، كەزىندە يادرولىق قارۋ تۇرلەرى سىنالىپ، قۋعىندالعاندار جەر اۋدارىلاتىن ايماق بولعان قازاقستاندا تەننيستىڭ قارقىندى دامۋى بريتاندىقتاردىڭ ءتۇرلى كەرەعار پىكىرلەرىنە ءبىراز وزگەرىس اكەلەتىن سىڭايلى» دەپ جازادى Independent باسىلىمى.
«ازاتتىق»
