ابدۋللا گۇل: نۇرسۇلتان نازاربايەۆ - تۇركى ينتەگراتسياسى مەن بىرلىگىنىڭ ۇيىتقىسى
تۇركى كەڭەسىنىڭ قۇرىلۋىنا، وسى يدەيالاردىڭ جۇزەگە اسىرىلۋىنا، اسىرەسە، پرەزيدەنت نۇرسۇلتان نازاربايەۆتىڭ سىڭىرگەن ەڭبەگى زور بولدى دەپ ايتا الامىن.
تۇركيا رەسپۋبليكاسىنىڭ ەكس-پرەزيدەنتى، كورنەكتى مەملەكەت قايراتكەرى ابدۋللا گۇل كەشە حالىقارالىق تۇركى اكادەمياسىندا وتكەن كەزدەسۋدە وسىلاي دەدى.
بۇل تۋرالى حالىقارالىق تۇركى اكادەمياسىنىڭ باسپا ءسوز قىزمەتى حابارلادى.
«ودان كەيىن تۇركى كەڭەسىنىڭ اياسىندا تۇرك پ ا سياقتى ينستيتۋتتاردى قۇردىق. سونىڭ ىشىندە پرەزيدەنت نۇرسۇلتان نازاربايەۆتىڭ ۇلكەن ءمان بەرگەن ينستيتۋتى - تۇركى اكادەمياسى. ونىڭ بۇل يدەياسىن مەن دە قولداپ، استانانىڭ تورىندە، وسىنداي ادەمى عيماراتتا اكادەميانى اشتىق. استانادا ورنالاسقانىمەن بۇل اكادەميانىڭ جۇمىسى بۇگىندە كۇللى تۇركى دۇنيەسىن قامتىپ وتىر. قىسقا عانا ۋاقىتتا كوپتەگەن ماڭىزدى ءىس-شارالار وتكىزدىڭىزدەر»، - دەدى ابدۋللا گۇل مىرزا.
ونىڭ ايتۋىنشا، تۇركىلەر ادامزاتتىڭ دامۋىنا ولشەۋسىز ۇلەس قوسىپ، باعا جەتپەس مۇرالار قالدىرعان. ولاردى تۇگەندەۋ، الەم جۇرتشىلىعىنا پاش ەتۋ وسى اكادەميانىڭ جۇمىسى ارقىلى مۇمكىن بولىپ وتىر.
ايتا كەتۋ كەرەك، استاناعا ساپارلاپ كەلگەن ابدۋللا گۇل مىرزا كەشە حالىقارالىق تۇركى اكادەمياسىنا كەلىپ، تۇركى دۇنيەسىندەگى عىلىم مەن ءبىلىم سالاسىن ۇيلەستىرۋشى ۇيىمنىڭ جۇمىسىمەن تانىستى.
كەزدەسۋگە بەلگىلى عالىمدار، مەملەكەت جانە قوعام قايراتكەرلەرى مىرزاتاي جولداسبەكوۆ، ءادىل احمەتوۆ، سەيىت قاسقاباسوۆ، ساۋىتبەك ابدراحمانوۆ، ەرلان سىدىقوۆ، عاريفوللا ەسىم، شاكىر يبرايەۆ جانە باسقا ءبىرقاتار زيالى قاۋىم وكىلدەرى قاتىسىپ، ءوز پىكىرلەرىمەن ءبولىستى. اكادەميا باسشىسى مارتەبەلى مەيماندارعا تۇركى دۇنيەسىنىڭ ءبىلىم جانە عىلىم سالاسىن ۇيلەستىرۋشى ۇيىمداعى اتقارىلعان ماڭىزدى ءىس- شارالار جونىندە بايانداپ ءوتتى.
قازاقستاندىق عالىمدار اتىنان ءسوز العان مىرزاتاي جولداسبەكوۆ ناحيچيەۆان سامميتىنەن باستاۋ العان تۇركى ينتەگراتسيالىق ۇدەرىستەرىنىڭ ماڭىزدىلىعىنا توقتالدى.
ءوز كەزەگىندە ابدۋللا گۇل مىرزا قۇرىلعانىنا 5 جىل تولىپ وتىرعان اكادەميا ۇجىمىنا ريزاشىلىعى مەن تىلەگىن ءبىلدىردى. جيىن سوڭىندا حالىقارالىق تۇركى اكادەمياسى تاراپىنان مارتەبەلى مەيمانعا قۇرمەت كورسەتىلدى.
