ن. نازاربايەۆ: استانا - ەۋروپا مەن ازيانىڭ گەوگرافيالىق ورتالىق نۇكتەسى

استانا. قازاقپارات - استانا - ەۋروپا مەن ازيانىڭ گەوگرافيالىق ورتالىق نۇكتەسى.

«روسسيا 24» تەلەارناسىنداعى «فورمۋلا ۆلاستي» باعدارلاماسىندا سۇحبات بەرگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.

اڭگىمە بارىسىندا ەلباسى استانانىڭ تۋعان كۇنىنە توقتالا كەلە، ءوزىنىڭ تۋعان كۇنى - 6 -شىلدە مەن قالا كۇنىنىڭ ءدوپ كەلۋىن قانداي دا ءبىر سيمۆوليكا بايلانىستىراتىنىن اتاپ ءوتتى. بۇل رەتتە مەملەكەت باسشىسى قازاقستاننىڭ جاڭا استاناسىن سالۋ تۋرالى شەشىمنىڭ قالاي، قانداي جاعدايدا قابىلدانعانىن دا ەسكە سالدى.

«1994 -جىل بولاتىن. كەڭەس وداعى ىدىراپ، كۇيرەگەن تۇس. مەملەكەتتە زەينەتاقى، مۇعالىمدەر مەن دارىگەرلەرگە جالاقى تولەيتىن اقشا بولماعان ەدى، ميليتسيانىڭ وزىنە جالاقى بىرنەشە ايعا دەيىن كەشىگىپ جاتاتىن. مىنە، وسى تۇستا مەن استانانى اقمولاعا كوشىرۋ كەرەك دەدىم. جاڭا مەملەكەتتە جاڭا تىرەك، جاڭا ءوسىم نۇكتەسى بولۋى كەرەك، ءبىر نارسەنى جاڭادان سالۋ قاجەت بولدى»، - دەي كەلە ن. نازاربايەۆ سول كۇنگى پارلامەنتتەگى تاريحي سەسسيانى ەسكە ءتۇسىردى.

«6 -شىلدە كۇنى پارلامەنتكە كەلدىم، ويتكەنى مەنىمەن ەشكىم دە كەلىسپەگەن، مەنى قابىلدامايتىن دا ەدى. پارلامەنت سەسسياسىندا ءسوز سۇراپ، ءوزىمنىڭ تۋعان كۇنىمدە قاۋلى قابىلداۋدى ءوتىنىپ، وسى ىسكە قاتىستى جوبانى العا تارتتىم. سوندا ءبىر قۇرمەتتى دەپۋتاتتاردىڭ ءبىرى: «قاراشى، ەگەر ءبىز شەشىم قابىلداعان كۇننىڭ وزىندە بۇنىڭ ءبارىن سالۋعا شامامەن 30-40 جىل كەتەدى. ال بۇگىن ونىڭ تۋعان كۇنى ەكەن. كوتەرىڭكى، جاقسى كوڭىل- كۇيمەن ۇيىنە قايتسىن، وسى شەشىمدى قابىلدايىق»، دەدى. وسىلايشا، تاريحي شەشىم قابىلداندى»، - دەدى ن. نازاربايەۆ.

بۇدان بولەك، مەملەكەت باسشىسى استانانىڭ ەۋرازيا قۇرلىعىنىڭ ناعىز ورتاسىندا ورنالاسقانىنا نازار اۋدارتتى.

«ەڭ تاڭدانارلىعى - استانا قالاسىنان 14 شاقىرىم جەردەن تابىلعان قازبالارعا سايكەس، ەلوردانىڭ استىندا بايىرعى بوزوق قالاسىنىڭ ورنى بار بولىپ شىقتى. بۇل عۇنداردىڭ استاناسى بولعان، ياعني ءبىر زاماندارداعى ناعىز ورتالىقتىڭ ءوزى ەدى»، - دەدى ن. نازاربايەۆ.

سونىمەن قاتار مەملەكەت باسشىسى استانا قالاسىنىڭ بۇگىنگى قارقىنىنا توقتالا كەلە، ەلوردانىڭ ناعىز بەيبىتشىلىك پەن كەلىسىم قالاسىنا اينالعانىن اتاپ ءوتتى. پرەزيدەنتتىڭ ايتۋىنشا، استانا بۇل جەر بەتىندەگى «يراننىڭ باس يمامى مەن يزرايل راۆۆينى ءبىر- بىرىمەن امانداسا الاتىن» بىردەن- ءبىر ورىنى ەكەنىن ەسكە سالدى.

«شىنىمەن، بۇل جالعىز وسىنداي ورىن. ارينە، بۇل جاقسى ەمەس پە؟! ولار وسىدان باستاپ ءبىر- بىرىنە جۇدىرىق الا جۇگىرگەنشە، اڭگىمەلەسۋدەن باستاعاننىڭ دۇرىس ەكەنىن استاناعا كەلگەندە سەزىنە باستايدى»، - دەدى ن. نازاربايەۆ.

اۆتور: قانات مامەتقازى ۇلى