س ە س ماماندارى قاۋىن-قاربىزداردى تامىزعا دەيىن الماڭىزدار دەپ دابىل قاعۋدا

استانا. قازاقپارات - ەلىمىزدىڭ سەس ماماندارى كوشە بويىندا نەمەسە بازاردا ساتىلىپ جاتقان قاۋىن- قاربىزداردى تامىز ايىنا دەيىن ساتىپ الماڭىزدار دەپ دابىل قاعىپ جاتىر.

ويتكەنى، بىرنەشە ايماقتاردا ارنايى تەكسەرىستەن وتكىزىلگەن جەمىس-جيدەكتەردە نيتراتتاردىڭ مولشەردەن تىس بولعاندىعى انىقتالعان.

مامانداردىڭ سوزىنشە، اسىرەسە ەلىمىزدىڭ وڭتۇستىك وڭىرىنەن جەتكىزىلەتىن تاۋار جولدا ەكى- ءۇش كۇن بوگەلىپ، ساتىلىمعا ءتىپتى ءبىر اپتادان كەيىن قويىلادى ەكەن.

 بيىل باقشا ونىمدەرى قاراعاندىعا ەرتە اكەلىنە باستادى. شالا پىسكەن جەمىس-جيدەكتەردى كاسىپكەرلەر بازارلاردى قويىپ، جول جيەگىندە ساتۋعا كوشكەن. ساۋداعا قويىلاتىن قاربىز- قاۋىنعا تەكسەرىس جۇرگىزەتىن ماماندار ولاردىڭ سانيتارلىق تالاپتارعا ساي كەلمەيتىنىن ايتادى. سوزدەرىنشە، باۋ - باقشا ونىمدەرىن ساتۋعا ارنالعان ورىن قورشالىپ، كۇن ساۋلەسىنەن، جاۋىن- شاشىننان قورعالۋى ءتيىس.

بوتاگوز ابىلدايەۆا، قاراعاندى وبلىستىق تۇتىنۋشىلاردىڭ قۇقىعىن قورعاۋ دەپارتامەنتىنىڭ باس مامانى:

- ماۋسىم باستالعانىمەن ولاردى ءالى جەۋگە بولمايدى. اسىرەسە، جولدىڭ شەتىندەگى ساۋدا ورىندارىنان ساتىپ الۋ وتە قاۋىپتى. قاربىزدار بيىكتىگى كەم دەگەندە 20 س م ارنايى سورەلەردە ساقتالۋى قاجەت.

قاربىزداردان وزگە، كارتوپ، المۇرت، قىزىلشا مەن قيار سەكىلدى كوكونىستەر دە وسىنداي ءدارى- دارمەكپەن پىسىرىلگەندىگى بايقالدى. بۇگىندە نيتراتتاردىڭ بار- جوعىنا باۋ- باقشا ونىمدەرىنىڭ 90 سىناماسى الىنعان.

ءبىراق بىلتىرعىدان قاراعاندا، قاربىزدىڭ قۇنىن الدەقايدا اسپانداتىپ جىبەرگەن كاسىپكەرلەر ءوز ىستەرىنەن ولقىلىق بايقامايدى. جول جيەگىندە ەش قۇجاتسىز ساۋدا جاساپ وتىرعان ولار «بيزنەسىمىز ءجۇرىپ كەتسە بولدى»، دەيدى. ءتىپتى، نيتراتى كوپ قوسىلسا دا، كۇنىنە جيىرمادان استام باقشا ونىمدەرىن وتكىزەتىنىن ماقتانىشپەن ايتادى.

ليۋدميلا دۋتكينا، ساۋداگەر:

 - جول جيەگىندە تۇرعاندىقتان ساۋدامىز قىزۋ جۇرەدى. ادامدار قاربىزداردى كوپتەپ الادى. قاربىزدىڭ پىسكەنىن، پىسپەگەنىن وڭاي انىقتاۋعا بولادى. نيتراتى كوپ قوسىلعان قاربىزداردا اق داقتار بايقالادى.

ال قاراشا حالىق جەمىس- جيدەكتەردىڭ ساپاسى كۇمان تۋدىرعانىمەن، كوز كورىپ، قول ۇستاپ تۇرعان ءتاتتى ءونىمدى ەرىكسىز ساتىپ الامىز دەيدى.

 س ە س ماماندارى، «جىلدام» دەگەن سۇرىپتاردىڭ ءوزى تەك شىلدە نەمەسە تامىز ايىنا قاراي پىسەتىنىن ايتادى. ونىڭ ءوزى، وڭتۇستىكتەن ەكى- ءۇش كۇن ىشىندە جەتكىزىلەتىندىكتەن، ءبۇلىنىپ قالادى دەيدى. سوندىقتان باقشا ونىمدەرىن ۇلكەن جاۋاپكەرشىلىكپەن تاڭداۋ كەرەك.

31-ارنا