بوكستان قازاقستاننىڭ جاسوسپىرىمدەر قۇراماسى الەم چەمپيوناتىنا قاتىسادى
ءدۇبىرلى دودا 4-12 -قىركۇيەكتە سانكت- پەتەربور قالاسىندا وتەدى، دەپ حابارلانعان ق ر بوكس فەدەراتسياسىنىڭ سايتىندا.
حالىقارالىق بوكس قاۋىمداستىعىنىڭ رەسمي سايتى: «بۇل جارىس بىلعارى قولعاپ جاس شەبەرلەرى ءۇشىن الداعى سپورتتىق ومىردەگى العاشقى قادامداردىڭ ءبىرى بولماق، سوندىقتان قاتىسۋشىلاردان جوعارى ساپالى بوكستى كۇتەمىن»، - دەپ AIBA پرەزيدەنتى دوكتور چينگ- كۋوۆۋدىڭ ءسوزىن كەلتىرگەن.
جاسوسپىرىمدەر قۇراماسىنىڭ اعا باپكەرى قايرات سايجانوۆتىڭ ايتۋىنشا، جاتتىقتىرۋشىلاردا تولىق قۇرامىن بەكىتۋ ءۇشىن ءبىر ايداي ۋاقىت بار. سپورتشىلار شىلدەنىڭ 10-26 سى ارالىعىندا ىستىقكولدە وقۋ- جاتتىعۋ جيىنىن وتكىزىپ، تامىزدىڭ باسىندا قوستانايداعى ا. ميروشنيچەنكو اتىنداعى جارىسقا قاتىسادى. تەك وسىدان كەيىن عانا الەم چەمپيوناتىنا اتتاناتىن بوكسشىلاردىڭ ەسىمدەرى بەلگىلى بولادى.
«الەم چەمپيوناتىنىڭ الدىندا 20 -تامىز بەن 2 -قىركۇيەك ارالىعىندا الماتىدا سوڭعى جيىنىن وتكىزىپ، سانكت- پەتەربور قالاسىنا جولعا شىعامىز، - دەيدى قايرات تۇرسىنحان ۇلى. - شىلدە- تامىز ايلارىنان كەيىن كەيبىر سالماق دارەجەلەرى بويىنشا شەشىم قابىلدايمىز، ارينە، كورسەتكىشتەرىمىزدى جاقسارتۋعا تىرىسامىز».
جارىسقا 13 سالماق دارەجەلەرى بويىنشا 15-16 جاسار بوكسشىلار قاتىسا الادى. سانكت-پەتەبور قالاسىنا 80 ەلدىڭ وكىلدەرى كەلەدى دەپ كۇتىلۋدە.
