گەرمانيا كانسلەرى تۇڭعىش رەت اۋىزاشارعا قاتىستى

استانا. قازاقپارات - گەرمانيا كانسلەرى انگەلا مەركەل تۇڭعىش رەت اۋىزاشار داستارحانىنا قاتىسىپ، يسلام ءدىنى جايلى ءوز پىكىرىن ءبىلدىردى، دەپ حابارلادى www.muslim.kz.

«ءسوزسىز، يسلام - گەرمانيانىڭ ءبىر بولىگى»، - دەدى گەرمانيا سىرتقى ىستەر مينيسترلىگىنىڭ بەرليندەگى قوناقتارعا ارنالعان رەزيدەنسياسىندا وتكەن اۋىزاشاردا.

بۇعان قوسا، نەمىس كانسلەرى رامازان ايىن ءدىني سەنىمدى نىعايتىپ، رۋحاني جاڭعىرۋ ايى دەپ اتاپ ءوتتى. سونداي-اق، سوڭعى ۋاقىتتارى الەمدە ورىن الىپ جاتقان لاڭكەستىك وقيعالاردىڭ يسلام دىنىمەن بايلانىستىرىلاتىنىنا وكىنىش ءبىلدىردى.

كانسلەر نەمىس ەلىندەگى مۇسىلمانداردى شەتتەتۋ مەن قىسىم كورسەتۋدى قولدامايتىنىن ايتتى.