ق ر پرەزيدەنتى جوعارى اسكەري وقۋ ورىندارىنىڭ تۇلەكتەرىنە وفيسەرلىك شەن تابىستادى - فوتو
بۇل تۋرالى بۇگىن ەلباسى نۇرسۇلتان نازاربايەۆ استانادا جىل سايىنعى ءداستۇر بويىنشا «اتامەكەن» ەتنو- مەموريالدى كەشەن الاڭىندا مەملەكەتتىك تۋ كوتەرۋ مەن وفيسەرلىك شەن تاپسىرۋدىڭ سالتاناتتى شاراسىندا ءمالىم ەتتى.
«بيىل ءبىز قازاق حاندىعىنىڭ قۇرىلعانىنا 550 جىلدىق مەرەكەسىن اتاپ وتەيىك دەپ وتىرمىز. بايراقتى باتىرلارىمىز جانە ەرجۇرەك بابالارىمىز ەلدىگىمىزدىڭ نەگىزىن قالاعان، سوندىقتان جاس ساربازدارعا وسى كۇنى وفيسەرلىك شەن تاپسىرۋدىڭ سيمۆولدىق ءمانى وتە زور. ءانۇران اۋەنىمەن كوتەرىلگەن كوك بايراق ءار قازاقستاندىقتىڭ بويىنا - جىگەر، جۇرەگىنە - نۇر قۇيادى دەپ سەنەمىن. رۋحىن اسىرىپ، مەرەيىن تاسىتادى. سونداي اسقاق سەزىممەن قۋات العان ەرلەرىمىز بىرىلىگىمىزدىڭ بەرىك قورعانى بولادى دەپ كامىل سەنەمىن»، - دەدى پرەزيدەنت.
سالتاناتتى شارا اياسىندا ق ر پرەزيدەنتى، ق ر قارۋلى كۇشتەرىنىڭ جوعارعى باس قولباسشىسى نۇرسۇلتان نازاربايەۆ ەلىمىزدىڭ جوعارى اسكەري وقۋ ورىندارىنىڭ تۇلەكتەرىنە وفيسەرلىك پوگون تابىستادى. ياعني، ق ر قورعانىس مينيسترلىگى قۇرلىق اسكەرى ينستيتۋتىنىڭ، ق ر ۇلتتىق ۇلانى اسكەري ينستيتۋتىنىڭ، ق ر ۇلتتىق قاۋىپسىزدىك كوميتەتى اسكەري ينستيتۋتىنىڭ ون ەكى تۇلەگى ەلباسىنىڭ قولىنان پوگون الدى. سالتاناتتى شارا بارىسىندا پاتريوتتىق كومپوزيتسيالار مەن اسكەري مارش ورىندالدى.
«بۇگىندە قازاقستاندا جوعارى اسكەري وقۋ ورىندارىن ءبىتىرىپ جاتقان تۇلەكتەر بارشىلىق. سولاردىڭ بارلىعىن بۇگىن سەندەر ارقىلى قۇتتىقتايمىن. سىزدەر ءوز ومىرلەرىڭىزدى وسى ماماندىققا بۇردىڭىزدار. سوندىقتان بۇل قىزمەت وڭاي جۇمىس ەمەس. وتاندى قورعاۋ قاسيەتى ءاربىر ادامنىڭ بورىشى!»، - دەدى ەلباسى.
اۆتور: رۋسلان عابباسوۆ
