وڭتۇستىكتە ەگىن وراعى باستالدى
اعىمداعى جىلى اۋىل شارۋاشىلىعى داقىلدارىنىڭ ەگىس كولەمى وتكەن جىلمەن سالىستىرعاندا، 6 مىڭ گەكتارعا ارتىپ، 785 مىڭ گەكتاردى قۇرادى. بيىل العاشقى بولىپ استىق ورۋ ناۋقانىن قازىعۇرت اۋدانىنىڭ ديقاندارى باستاسا، كەلەسى وراقتى ورداباسى اۋدانى جالعاستىرىپ وتىر.
تاۋلى وڭىردە جالپى 34 مىڭ گەكتارعا جۋىق جەرگە بيداي ەگىلگەن. ەرتە كوكتەمدە جاۋىن- شاشىننىڭ كوپتىگىنەن ەگىن دە بىتىك شىققان. ياعني جالپى ءونىم كولەمى 80 مىڭ توننادان اسادى دەپ بولجانىپ وتىر. ال، ورداباسىدا وسى جىلى ەگىستىك جەردىڭ كولەمى 55 مىڭ گەكتاردان استام بولسا، بيداي داقىلى 14 مىڭ گەكتارعا جەتتى.
اۋدانداعى ەگىن ورۋ ناۋقانى جۇمىستارىمەن تانىسقان وبلىستىق اۋىل شارۋاشىلىعى باسقارماسىنىڭ باسشىسى ق. وسپانبەكوۆ بيدايدان 236 مىڭ توننا ءونىم جيناۋ جوسپارلانىپ وتىرعاندىعىن ايتتى. باسقارما باسشىسىنىڭ سوزىنە قاراعاندا، اۋىل شارۋاشىلىعى داقىلدارىنىڭ ەگىس قۇرىلىمىن ءارتاراپتاندىرۋدىڭ ناتيجەسىندە سوڭعى جىلدارى ءداندى داقىلدار 46 مىڭ گەكتار، مال ازىقتىق داقىلداردىڭ كولەمى 62 مىڭ، كوكونىس، باقشا 6 مىڭ گەكتارعا ارتىپ، تيىسىنشە ماقتانىڭ كولەمى 40 مىڭ گەكتارعا، مايلى داقىلداردىڭ كولەمى 30 مىڭ گەكتارعا كەمىپ وتىر.
ەگىن وراعى ناۋقانىمەن قاتار، مال ازىعىن دايىنداۋ جۇمىستارى دا جۇرگىزىلۋدە. بۇگىنگى كۇنگە مەجەلەنگەن ءۇش مىڭ توننانىڭ 2073 مىڭ تونناسى دايىندالدى. بيىلعى جىلى كۇزگى ەگىن جيناۋ جۇمىستارىن جۇرگىزۋ ءۇشىن بولىنگەن جانار- جاعارماي كولەمى وتكەن جىلمەن سالىستىرعاندا، 5 مىڭ تونناعا ارتقان.
