د س ۇ- عا مۇشە بولۋ قازاقستاننىڭ ەكسپورتتىق الەۋەتىن ارتتىرادى - ن. ءابىلشايىقوۆ
ونىڭ ايتۋىنشا، د س ۇ- عا كىرۋدىڭ قازاقستان ءۇشىن ءبىرقاتار پايدالى تۇستارى بار. ولاردىڭ ءبىرى ەكسپورتتىق پوتەنتسيالدى ارتتىرۋ.
«ءبىزدىڭ تاۋار وندىرۋشىلەر ءوز ءونىمىن شەتەلگە كەڭىنەن ساتا المايدى. ويتكەنى، كوپ ەلدەردە انتيدەمپينگتىك باعدارلاما بار. ولار ءوز نارىعىن قورعايدى. سىرتتان كەلەتىن تاۋارعا سالىق جۇكتەمەسى كوپ. وسىلايشا، قانشا جەردەن ارزان بولسا دا، سەنىڭ تاۋارىڭنىڭ باعاسى ءوسىپ كەتەدى. ەندى قازاقستان د س ۇ- نىڭ تولىققاندى مۇشەسى اتانسا، كەدەرگىلەر بارلىق ەلدە بىردەي بولادى. بۇل كەدەرگىلەر بىرەگەي كەدەن تاريفىمەن رەتتەلەتىن بولادى. ءبىز ەكسپورتتايتىن تاۋارلارعا قوسىمشا سالىق قوسىلمايدى. سوندىقتان ولار باسەكەگە قابىلەتتى بولادى»، - دەدى ول.
ساراپشى د س ۇ- عا كىرۋدىڭ ءالى دە وزەكتى تۇستارى بار ەكەندىگىن اتاپ ءوتتى.
ونىڭ ايتۋىنشا، الەمدىك ساۋدا ۇيىمىنىڭ مۇشەلىگىنە ءوتۋ اۋىلشارۋاشىلىق كەشەنىنىڭ دامۋىنا كەدەرگى كەلتىرۋى مۇمكىن.
«ءبىز ارزان يمپورتتىڭ نارىقتى باسىپ قالۋىنان قورقامىز. ەڭ الدىمەن اۋىلشارۋاشىلىق كەشەنىنىڭ زارداپ شەگۋى مۇمكىن. بۇگىندە مەملەكەت فەرمەرلەردى قورعاۋ شارالارىن جۇزەگە اسىرىپ جاتىر. ماسەلەن ناۋقان كەزىندە جانار- جاعارمايدى ارزان باعامەن جەتكىزەدى. د س ۇ شارتتارى بويىنشا مۇنداي قولداۋ شارالارىن مەملەكەت جۇزەگە اسىرماۋ كەرەك. ءبىراق ءبىزدىڭ كەلىسىم توبى قازاقستان ءۇشىن بۇل پوزيتسيانى ساقتاپ قالدى»، - دەدى ساراپشى.
اۆتور: گۇلميرا عوسمانالي
