بيىل كۇزدە وتەتىن القالى باس قوسۋدا قازاق كۇرەسىنىڭ جاڭا اتاۋى تالقىلانادى
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر قازاق كۇرەسى فەدەراتسياسىنىڭ پرەزيدەنتى ارمان شورايەۆ ءمالىم ەتتى.
«قازاق كۇرەسىنىڭ اتاۋىن وزگەرتۋ بويىنشا قىزۋ تالقىلاۋلار ءجۇرىپ جاتىر. بۇرىندارى بابالارىمىز «ءجۇر، قازاقشا كۇرەسەيىك» دەپ ايتقان جوق قوي. ياعني، ولار «بەلدەسەيىك» نەمەسە «كۇرەسەيىك» دەپ ايتقان ەدى. كۇرەسىمىزدى الەمگە كەڭىنەن تاراتامىز دەسەك، اتاۋىن وزگەرتكەن دۇرىس بولار. بۇل تۇرعىدا مۇمكىن «بەلدەسۋ» بولاتىن شىعار. اماندىق بولسا، بيىلعى كۇزدە ۇلكەن عىلىمي- تاجىريبەلىك كونفەرەنتسيا وتكىزەمىز. سول كەزدە عالىمداردىڭ، تاريحشىلارمەن كەڭىنەن تالقىلايمىز»، - دەدى ا. شورايەۆ.
بۇدان بۇرىن حابارلانعانداي، وليمپيادالىق ويىنداردىڭ باعدارلاماسىنا ەنگىزۋ باعىتىندا «قازاق كۇرەسى» دەپ كىرگىزۋ وتە قيىن. سەبەبى، بۇل تۇرعىدا وزبەكتەردىڭ جانە قىرعىزداردىڭ كۇرەسى شىعادى. سونىمەن قاتار اتاۋدى وزگەرتۋدەگى باستى سەبەپ - ۇلتتىق كۇرەستىڭ بۇرىنعى تاريحي اتاۋىنا قايتىپ كەلۋ.
اۆتور: رۋسلان عابباسوۆ
