قازاقستاندىق ساۋلەتشى استاناعا ىستىقتان قورعايتىن ەرەكشە كۇمبەز ورناتۋدى ۇسىندى

استانا. قازاقپارات - «استانا ساۋلەتى: بۇگىن، ەرتەڭ» اتتى كونفەرەنسيادا تانىمال قازاقستاندىق ساۋلەتشى باقىتجان اشىربايەۆ استانانى ىستىقتان قورعاۋ ءۇشىن ەلەكتروماگنيتتىك شاتىر ورناتۋدى ۇسىندى.

«ەستەرىڭىزدە بار ما، كەزىندە ەلوردا ءۇستىن كۇمبەزبەن جابۋدى ويلاستىرعان بولاتىن. قازىر عالىمدار ەلەكتروماگنيتتى ءورىس بويىنشا جۇمىس جاساپ جاتىر. «ەكى دەڭگەيلى قابىرشاق» دەپ اتالادى. اۋا-رايى ناشار، قاتتى ىستىق بولعاندا جابىلادى. كەشە مىسالى، اپتاپ ىستىق بولدى. شىمكەنتتەن دە اسىپ تۇسكەن شىعار، شىنى كەرەك. وسىنداي ىستىق وتپەۋى ءۇشىن، جاۋىپ قويساڭ بولادى. قۇرىلعى قويىلادى. اۋانى دا وتكىزەدى، ىستىقتان دا قورعايدى»، - دەيدى ول.

وسىدان ءۇش جىل بۇرىن جەرگىلىكتى ارحيتەكتور ەۆگەني نيەۆەليچكوۆ تا وسىنداي ۇسىنىس تاستاعان بولاتىن. ونىڭ ويىنشا، ءمولدىر، كوزگە كورىنبەيتىن كۇمبەز استانانىڭ سول جاق جاعالاۋىن ىستىقتان قورعاپ قانا قويمايدى، تۋريستەردىڭ اعىلۋىنا دا سەپتىگىن تيگىزەر ەدى. ول جوبا 1 ميلليارد دوللار بولادى دەپ ەسەپتەپ قويعان دا بولاتىن. دەگەنمەن جوبا تۋريستەر مەن ەنەرگيا ۇنەمدەۋ ارقىلى ءوزىن ءبىر جىلدىڭ ىشىندە اقتايدى دەپ سانادى.

اۆتور: جاسۇلان جولدىبايەۆ