جۇلدىزدار «استانا جۇلدىزى» تۋرالى نە دەيدى؟
استانا جۇلدىزى ءۇشىنشى ۇلتتىق مۋزىكا بايگەسى 2015 -جىلدىڭ 4 - شىلدە كۇنى، استانا قالاسىندا، بەيبىتشىلىك پەن كەلىسىم سارايىندا وتەدى. بايگە باستاماشىسى - استانا قالاسى اكىمدىگى. ۇيىمداستىرۋشى - «Adam Media Group» .
ۇلتتىق بايگە وتەتىن كۇنى ەلوردا تۇرعىندارى كەرەمەت قويىلىمنىڭ كۋاسى بولادى: قىزىل كىلەم ۇستىنەن قازاقستاندىق مۋزىكا، شوۋ- بيزنەس جانە كينو سالاسىنداعى تانىمال تۇلعالار ءجۇرىپ وتەدى.
قىزىل كىلەم ساعات 17.00-دە باستالادى.
اتاۋلى كۇنى ەڭ ۇزدىك ونەرپازدار، ەڭ ۇزدىك قاتىسۋشىلار جانە ەڭ ۇزدىك داۋىستار ماراپاتتالادى.
«استانا جۇلدىزى» ۇلتتىق مۋزىكا بايگەسى - وتاندىق مۋزىكا وندىرىسىندەگى تەڭدەسى جوق تىڭ قۇبىلىس. سوڭعى جىلدارى تاعايىندالعان سان قيلى مۋزىكالىق سىيلىقتاردان باستى وزگەشەلىگى - «استانا جۇلدىزى» - بىرىنشى كاسىبي مۋزىكالىق بايگە. وتاندىق مۋزىكانىڭ دامۋىنا، جاڭارىپ، جاڭعىرۋىنا اسەر ەتكەن ۇزدىك ونەرپازداردى قۇرامىندا 100 كاسىبي مامان- ەڭبەگى سىڭگەن ارتىستەر، پروديۋسەرلەر، كومپوزيتورلار، اقىندار، مۋزىكا جانە fashion^- ءوندىرىس ماماندارى، ب ا ق وكىلدەرى بار قازاقستاننىڭ مۋزىكالىق اكادەمياسى تاڭدايدى. داۋىس بەرۋدىڭ وسى جۇيەسى الەمدىك دەڭگەيدە قولدانىلىپ ءجۇر. جوبانىڭ باستى ماقساتى - كاسىبي بىلىكتى ساراپشىلاردىڭ تاڭداۋى ارقىلى ۇلتتىق مۋزىكانىڭ وركەندەپ، ورلەۋىنە ىقپال ەتۋ، ساپالى مۋزىكانىڭ سۇرانىسقا كەڭىنەن يە بولۋىنا جاعداي جاساۋ.
قاراقات ءابىلدينا (ءانشى) :
«استانا جۇلدىزى» ۇلتتىق مۋزىكا بايگەسىنە دايىندىعىڭىز قانداي؟
- «استانا جۇلدىزىن» اسىعا كۇتىپ جۇرگەندەر قاتارىنانمىن. كوڭىل- كۇي وتە كوتەرىڭكى. ەسترادا ارتىستەرىنە ارنالعان وسى ۇلكەن مەرەكەگە بارىنشا قىزۋ دايىندىق جاساۋدامىز. وتە كوڭىلدى، ءان مەن كۇيگە، دوستىق سىرلاسۋعا، ارىپتەستەر ءۇشىن قۋانىشقا تولى كۇن بولادى دەپ ۇمىتتەنىپ وتىرمىن. جالپى شىلدە ايىنىڭ وسى اپتاسى تاماشا مەرەكەلەرمەن ەستە قالادى. سوندىقتان تاعاتسىزدانا كۇتىڭىزدەر دەگىم كەلەدى.
قىزىل كىلەمگە قانداي ديزاينەر كيىمىن كيەسىز؟
4 -شىلدە كۇنى بىرنەشە شاراعا قاتىساتىن بولىپ وتىرمىن. سوندىقتان « Samidel '» مەن «ارۋناز» ءسان ۇيلەرىنە بىردەي تاپسىرىس بەرىپ قويعانمىن. ءالى تىگىلىپ جاتىر.
«استانا جۇلدىزىنا» قاتىسۋ ءسىز ءۇشىن قانشالىقتى ماڭىزدى؟
ارىپتەستەردىڭ بيىككە جەتۋىنە قۋانۋ مەن ءۇشىن وتە ماڭىزدى. «استانا جۇلدىزى» قازاقستاندىق مۋزىكانىڭ ورتاق جەڭىسى مەن جەمىسى. دوستار، تانىستار، ارىپتەستەرمەن سىرلاسىپ، شۇيىركەلەسىپ، قۇتتىقتاپ بىرگە بولۋ كەرەمەت سەزىم. جاستارمەن تانىسىپ، ورتاق ءىسىمىزدىڭ جەتكەن بيىگى مەن العان باعىتىن ءبىلۋ، جاڭالىقتارىنان قۇر قالماۋ - ءبىز ءۇشىن ۇلكەن قۋانىش.
«استانا جۇلدىزىن» كىمگە تابىستار ەدىڭىز؟
وتە قيىن سۇراق. ارىپتەستەر ءبىر جىل بويى شارشاماي- تالماي ەڭبەك ەتتى. بارىنە ءبىر- ءبىر «استانا جۇلدىزىن» ۇسىنۋعا بولار ەدى. الايدا بىرەگەيلەرى جەڭىسكە جەتسىن جەپ تىلەيمىن.
گۇلزيرا ۇسەن قىزى (قايرات نۇرتاستىڭ پروديۋسەرى)
«استانا جۇلدىزى» ۇلتتىق مۋزىكا بايگەسىنە دايىندىعىڭىز قانداي؟
جىل سايىن وتاندىق ءانشى- مۋزىكانتتاردىڭ مەرەيىن اسىراتىن شاراعا دايىندىق كەرەمەت. ەلىمىزدىڭ شوۋ- بيزنەسى ءۇشىن ەكىنشى جاڭا جىل سياقتى. ءبارى اسىعا كۇتەدى. سول كۇنى ءبىر- ءبىرىن قۇتتىقتاپ، ويناپ- كۇلىپ جاتادى. ونداي مەرەكەگە دايىن بولماۋ مۇمكىن ەمەس.
قىزىل كىلەمگە قانداي ديزاينەر كيىمىن كيەسىز؟
نەگىزى بىرنەشە ءسان ۇيىنە تاپسىرىس بەرىپ قويدىم. ۇلگىسى، ءتۇر- ءتۇسى ءارقيلى. وسى ەكى- ءۇش كۇندە بارىپ دايىن كويلەكتەردى الامىن. «استانا جۇلدىزىنىڭ» قىزىل كىلەمىنە لايىقتىسىن تاڭداپ كيەمىن.
«استانا جۇلدىزىنا» قاتىسۋ ءسىز ءۇشىن قانشالىقتى ماڭىزدى؟
وسى شوۋ- بيزنەسكە قاتىسىم بار دەيتىن ءار ءارتىس، ءار مۋزىكانت، ءار پروديۋسەر ءۇشىن «استانا جۇلدىزىنا» قاتىسۋ اسا ماڭىزدى دەپ ويلايمىن. سوندىقتان مەن عانا ەمەس، قانشاما ارىپتەستەر اسىعا كۇتىپ ءجۇر.
«استانا جۇلدىزىن» كىمگە تابىستار ەدىڭىز؟
ارىپتەستەردىڭ ءار جەڭىسىنە قۋانامىن. ءبارى دە ءوز بالام، ءوز ءىنى- سىڭىلىلەرىم سياقتى. ەڭبەكتەرى جانىپ، لايىقتى باعالارىن السىن دەپ تىلەيمىن.
اينۇر تۇرسىنبايەۆا (ايتىسكەر)
«استانا جۇلدىزى» ۇلتتىق مۋزىكا بايگەسىنە دايىندىعىڭىز قانداي؟
دايىندىعىم وتە جاقسى. جىلدا وتە جوعارى دەڭگەيدە وتەتىن شارانىڭ جيىرەك، كوبەرىك بولۋىن قالايمىن. جاستارعا جاقسى ستيمۋل بەرەدى. بيىل دا تاڭقالدىرا، تامساندىرا وتەتىنىنە كۇمانىم جوق.
قىزىل كىلەمگە قانداي ديزاينەر كيىمىن كيەسىز؟
مەن جىل سايىن قىزىل كىلەمگە ارنايى كيىم تىكتىرەمىن. بيىل دا ول داستۇرىمنەن جاڭىلمايمىن. الايدا قانداي ءسان ءۇيى ەكەنى ازىرگە قۇپيا بولىپ قالسىن.
«استانا جۇلدىزىنا» قاتىسۋ ءسىز ءۇشىن قانشالىقتى ماڭىزدى؟
ەڭ بىرىنشىدەن وتاندىق جوبا. جۇمىلعان جۇدىرىقتاي بىرگە اتسالىسۋ وتە ماڭىزدى. وسىنداي اۋقىمدى شارانىڭ بەل ورتاسىندا ءجۇرۋ، تاريحي شارانىڭ بولشەگى بولۋ - ۇلكەن قۇرمەت.
«استانا جۇلدىزىن» كىمگە تابىستار ەدىڭىز؟
ءوزىمنىڭ قۇربىم، قازاق ەستراداسىنىڭ جارىق جۇلدىزى، ەڭبەكقور، حالىقتىڭ سۇيىكتى قىزى قاراقات ءابىلديناعا تابىستاعىم كەلەدى.
ساكەن مايعازيەۆ («مۋزارت» توبىنىڭ ءانشىسى)
«استانا جۇلدىزى» ۇلتتىق مۋزىكا بايگەسىنە دايىندىعىڭىز قانداي؟
ارينە، كۇتىپ، داينىدالىپ ءجۇرمىن. وتاندىق دۇنيەنى قولداۋ ازاماتتىق پارىزىمىز. العا جاسالعان ءاربىر قادام ءۇشىن شەكسىز قۋانامىن. ۇيىمداستىرۋشىلاردىڭ كاسىبي دەڭگەيىنە تيتتەي دە كۇمانىم جوق. قايتا ريزاشىلىعىم تەڭىزدەي. ونىڭ ۇستىنە استانا - ەلوردامىزدىڭ تۋعان كۇنىنە ورايلاستىرىلعان مەرەكە بولعان سوڭ، دايىندىق ەكى ەسە قىزۋ.
قىزىل كىلەمگە قانداي ديزاينەر كيىمىن كيەسىز؟
«مۋزارت» انسامبلىمەن 8 جىل قاتارىنان جۇمىس ىستەپ كەلە جاتقان اسەم تەڭىزبايەۆا اتتى قارىنداسىمىز بار. ۇنەمى سول قارىنداستىڭ قولىنان شىققان كوستيۋمدەردى كيەمىز. بيىل دا سول داستۇردەن جاڭىلمايتىن شىعارمىز.
«استانا جۇلدىزىنا» قاتىسۋ ءسىز ءۇشىن قانشالىقتى ماڭىزدى؟
«استانا جۇلدىزى» - الدىڭعى بۋىن اعالار مەن كەيىنگى بۋىن ىنىلەردىڭ توعىساتىن، كەزدەسىپ، سىرلاسىپ، قۋانىشقا ورتاقتاساتىن جيىنى. سونىسىمەن اسا ماڭىزدى. جىل سايىن جاس مەن بەدەلىنە قاراماي ءبارىن ءبىر جەرگە جيناپ، ورتاق مەرەكە سىيلاۋ يدەياسى وتە كەرەمەت. ونىڭ قۇرمەتتى قوناعى بولۋ ءبىز ءۇشىن اسا ماڭىزدى.
«استانا جۇلدىزىن» كىمگە تابىستار ەدىڭىز؟
بيىل ءار ءانشى ءوز دەڭگەيىندە جۇمىس جاسادى. ىشتەي جاقسى كورەتىن انشىلەرىم كوپ. كوبىنە جاستاردى قولداعىم كەلەدى. بارىنە بىردەي بەرەر ەدىم. دەگەنمەن لايىقتىسى جەڭەتىنىنە سەنىمىم مول.
baistars.kz
