كاسىپكەرلەر زاڭعا «كەشىرىم» بابىن ەنگىزۋدى سۇراۋدا

استانا. قازاقپارات - بۇگىن استانا بويىنشا ۇلتتىق كاسىپكەرلەر پالاتاسىنىڭ وتىرىسىندا كاسىپكەرلەر اكىمشىلىك قۇقىق بۇزۋشىلىق تۋرالى كودەكسكە كەشىرۋدى ەسكەرەتىن ارنايى باپتاردى ەنگىزۋدى سۇراۋدا.

ولاردىڭ ايتۋىنشا، سالىق جانە اكىمشىلىك قۇقىق بۇزۋشىلىق تۋرالى كودەكستەرىنىڭ شيكىلىگىنەن تۋىنداعان ماسەلەلەردىڭ كەسىرىنەن كاسىپكەرلەرگە ءىرى كولەمدە ايىپپۇلدار سالىنۋدا. مۇنداي تىعىرىققا، اسىرەسە، اراق- شاراپ ساتۋعا ليتسەنزيا العان كاسىپكەرلەر كەلىپ تىرەلۋدە.

پالاتانىڭ كاسىپكەرلەر قۇقىعىن قورعاۋ باسقارماسىنىڭ ساراپشىسى نۇرجان بۋكيننىڭ ايتۋىنشا، ءوز ءىسىن توقتاتقان جانە اراق- شاراپ ساتۋدان ەندى پايدا المايتىن جەكە كاسىپكەرلەر 300 مىڭ تەڭگە ايىپپۇل تولەۋگە ءماجبۇر.

سەبەبى ءوزىنىڭ زاڭدىق قىزمەتىن توقتاتقانمەن، ليتسەنزيانىڭ كۇشى جويىلماعان. «2015 -جىلى 1 -قاڭتارداعى زاڭعا ەنگىزىلگەن وزگەرتۋلەرگە بايلانىستى قولىندا ليتسەنزياسى بار كاسىپكەرلەر، ءبىراق جىلدىق جارنا تولەمەگەن بولسا، 150 ا ە ك، ياعني 300 مىڭ تەڭگە كولەمىندە ايىپپۇل تولەۋلەرى ءتيىس.

جىلدىق جارنا استانا قالاسىندا 100 ا ە ك دەڭگەيىندە بەلگىلەنگەن. ءبىزدىڭ پالاتاعا كەلىپ تۇسكەن ارىزدار بويىنشا، شاعىمدانۋشىلاردىڭ ەكى توبى بار: دۇكەندەرىن جاپقان، دەگەنمەن ليتسەنزيانىڭ جىلدىق جارناسىن تولەمەگەندەر مەن جىلدىق جارنانى دۇكەننىڭ ورنالاسقان اۋدانى بويىنشا تولەگەندەر، ءبىراق ولاردىڭ تىركەلگەن اۋدانى باسقا»، - دەيدى ول.

ن. بۋكيننىڭ سوزىنە قاراعاندا، مەملەكەتتىك كىرىس ورگاندارى ول كاسىپكەردىڭ سالىقتىق ەسەپتى توقتاتقاندىعىن، كاسسالىق جابدىقتار مەن تىركەلۋ كارتاسى تاپسىرىلعاندىعىن جانە ول كاسىپكەردىڭ الكوگولدىك ىشىمدىكتەردى ساتپايتىندىعىن بىلە تۇرا، ءبارىبىر ايىپپۇل سالۋدا. سەبەبى، قازاقستاننىڭ سالىق زاڭناماسىندا رۇقساتناماسى بار تۇلعالاردىڭ بارلىعى جىلدىق جارنانى تولەۋگە مىندەتتى.

«قازىرگى ۋاقىتتا ۇلتتىق كاسىپكەرلەر پالاتاسى زاڭعا ءتيىستى وزگەرتۋلەر مەن تۇزەتۋلەر ەنگىزۋ ءۇشىن ۇسىنىس جولدادى. ولار قارالۋدا» ، - دەدى ول.

 دەگەنمەن، ايىپپۇل العان بۇرىنعى جەكە كاسىپكەرلەر ونىڭ وزگەرۋىنە دەيىن كۇتە المايتىندىقتارىن ايتۋدا. سەبەبى زاڭنىڭ شيكىلىگىنەن 200-300 مىڭ تەڭگە قالتادان شىعارۋ قاجەت. سوعان وراي، ولار اكىمشىلىك قۇقىق بۇزۋشىلىق تۋرالى كودەكسكە زاڭ شيكىلىگىنەن تۋىنداعان داۋلاردى شەشۋ ءۇشىن «كەشىرىم» بابىن ەنگىزۋدى سۇراۋدا.

 «2015 -جىلعى 1 -قاڭتارداعى كودەكستە مۇنداي باپ جوق. ونىڭ الدىندا 2014 -جىلعى رەداكتسيادا كاسىپكەرلەردىڭ كىناسىنەن ەمەس ولقىلىقتاردى شەشۋگە مۇمكىندىك بەرەتىن بىرنەشە باپتار بولدى. كاسىپكەردە قاتەلىك جاساۋ قۇقىعى جوق»، - دەيدى ن. بۋكين.

اۆتور: جاسۇلان جولدىبايەۆ