ەۋرازيالىق ەكونوميكالىق وداقتىڭ ءوزى ەۋروپا ءۇشىن قاجەتتىلىككە اينالادى
«قازىر ەۋرازيالىق ەكونوميكالىق وداق اياسىندا ءبارى جاقسى دەۋگە بولمايدى، جالپى ساۋدا ءتۇسىپ كەتتى. الايدا، بۇنىڭ بولۋى زاڭدىلىق. سوعان قاراپ، سۇمدىقتىڭ ءبارىن وداقتىڭ باسىنا ۇيىرۋگە بولمايدى. ويتكەنى، جاعداي سونداي. ءبىز بۇنداي قاتەرلەر بولاتىنىن ايتپاپ پا ەدىك؟ بۇنداي جاعدايدىڭ بولۋ سەبەبى باعا قۇلدىرادى» ، - دەدى ن. نازاربايەۆ. سونىمەن قاتار، ەلباسى ە ا ە و اياسىندا جالپى ساۋدا 15-20 پايىزعا تومەندەگەندىگىن ايتىپ، بۇل وسىلاي تۇرا بەرمەيتىنىن، الدا دامۋ جاندانىپ، ساۋدا قايتا كوتەرىلەتىنىن جەتكىزدى. ويتكەنى، ە ا ە و اياسىندا كاسىپورىندار ءوزارا ارەكەتتەستىك جاساۋدا، جۇمىس كۇشى مەن تەحنولوگيالار دا الماسىلىپ جاتىر.
«مەن ساۋەگەيلىك جاساعىم كەلمەيدى، ءبىراق ءبىزدىڭ ەۋرازيالىق ەكونوميكالىق وداق پەن ەۋروپالىق وداق مىندەتتى تۇردە ىنتىماقتاساتىنىنا ابدەن سەنىمدىمىن. بۇل اللانىڭ قالاۋىمەن بولادى. بۇگىنگى كەدەرگىلەر، سانكتسيالار بۇلاردىڭ ءبارى ارتتا قالادى. ەۋرازيالىق ەكونوميكالىق وداقتىڭ ءوزى ەۋروپا ءۇشىن قاجەتتىلىككە اينالادى. رەسەيدىڭ ەكونوميكاسى دا ەۋروپا ءۇشىن ماڭىزدى بولادى. سونىڭ ناتيجەسىندە ۇلكەن ىنتىماقتاستىق مىندەتتى تۇردە ورىن الادى. قازىردىڭ وزىندە ەۋروپادا ە ا ە و- پەن ەركىن ساۋدا تۋرالى نيەت بىلدىرۋشىلەر بارشىلىق» ، - دەدى ن. نازاربايەۆ.
سونىمەن قاتار، پرەزيدەنت «جىبەك جولى- ەكونوميكالىق بەلدەۋى» يدەياسىن العا تارتا وتىرىپ، وسىنىڭ ءوزى ەۋرازيالىق ينتەگراتسيا ەكەنىن اتاپ ءوتتى. «ءبىز وسى ەكونوميكالىق بەلدەۋ ارقىلى ەۋروپاعا شىققىمىز كەلەدى ەمەس پە؟ ءبىز وسىنى «باتىس ەۋروپا- باتىس قىتاي» جوباسى ارقىلى، تەمىرجولدار ارقىلى، كاسپي تەڭىزى ارقىلى ىستەپ جاتىرمىز. وسىنىڭ ءبارى تىنىق مۇحيتى مەن اتلانت مۇحيتىنا دەيىنگى ارالىقتا ءومىر سۇرەتىن حالىقتار مۇددەسى ءۇشىن اتقارىلىپ جاتقان قادامدار. ەگەر ەكونوميكالىق ينتەگراتسيا بولسا، وندا بەيبىتشىلىك تە بولادى. ياعني، ەۋرازيالىق ەكونوميكالىق وداق پەن ەۋروپالىق وداقتىڭ ىنتىماقتاستىق ۇدەرىسىنەن ەشكىم دە قۇتىلا المايدى» ، - دەدى ەلباسى.
اۆتور: قانات مامەتقازى ۇلى
