ارزان باعاعا قىزىققان تۋريستەر ۆەنەسۋەلاعا اعىلۋدا- فوتو

استانا. قازاقپارات - اۋىر ەكونوميكالىق داعدارىستى باستان كەشكەن ۆەنەسۋەلادا تۇرمىسقا قاجەتتى كوپتەگەن زاتتى تابۋ ءالى دە قيىن. سونىمەن قاتار ەلدە قىلمىس دەڭگەيى جوعارىلاپ بارادى. ءبىراق سوعان قاراماستان، بۇل ەلگە ساياحاتتاۋعا كەلەتىن شەتەلدىك تۋريستەر سانى ازايار ەمەس.

 ۆەنەسۋەلا حالىق قاپتاپ جۇرەتىن تۋريستىك باعىت بولماسا دا، كەلۋشىلەر سانى باسىم. ساياحاتشىلاردى ەڭ الدىمەن مۇنداعى ارزان باعالار قىزىقتىرادى.

 ماسەلەن، كاريب تەڭىزىندەگى ارالعا قايىقپەن ءبىر كۇنگە شىعۋ نە بارى 15 دوللار، ال اند تاۋلارى نەمەسە امازوننىڭ نۋ ورماندارىنا جول كورسەتۋشىلەرمەن بىرگە ءبىر اپتالىق ساياحات 125 دوللار تۇرادى. ال ەگەر ەشقايدا بارماي، جاعاجايدا جاتۋدى قالاساڭىز، قوناقۇيدەگى ءبىر تاۋلىكتىڭ قۇنى 5 اق دوللار.

 ەدۋارد حارتۆيچ، گەرمانيا تۇرعىنى:

 - مۇنداعى ەڭ باستى ماسەلە - اقشانى ايىرباستاۋ. ەگەر رەسمي باعامەن اۋىستىرساڭ، تىم قىمبات، ءبىراق مەن تانىستارىمنىڭ كومەگىمەن اقشامدى ءتيىمدى ايىرباستادىم. ون كۇندە ءبىراز جەرگە بارىپ، تالاي جەردى كورگەنىممەن، جالپى شىعىنىم ءجۇز ەۆرودان اسقان جوق.

 شەتەلدىكتەر ءۇشىن ۆەنەسۋەلاداعى باعالار بىلتىردان باستاپ ارزانداعان. وتكەن جىلى قارا نارىقتاعى دوللار باعاسى التى ەسە ءوسىپ، 70 بوليۆاردان 400 بوليۆارعا كوتەرىلدى. بۇل تۋريستەرگە قولايلى بولعانىمەن، جەرگىلىكتى تۇرعىنداردىڭ تۇرمىسى كۇرت ناشارلاپ كەتتى. 2014 - جىلى ەلدەگى ينفلياتسيا كورسەتكىشى % 68 دى قۇراسا، بيىل ودان دا جوعارى بولاتىن ءتۇرى بار.

 دجۋليان، ارگەنتينا تۇرعىنى:

 - ۆەنەسۋەلاعا ساياحاتتىڭ ەڭ قىمباتى - ۇشاقتىڭ جولاقىسى. ونان باسقاسىنىڭ ءبارى ارزان. ەۋروپا نەمەسە ا ق ش تۇرعىندارى ءۇشىن بۇل تۇك تە ەمەس، ءبىزدىڭ قالتامىزعا ارينە قيىنداۋ.

شەتەلدىكتەر ۆەنەسۋەلاعا دەمالۋعا كەلسە، جەرگىلىكتى تۇرعىندار كۇنىن ارەڭ كورىپ ءجۇر. دەگەنمەن باعالاردىڭ ارزاندىعىنا قاراماستان، تۋريزم سالاسى دا ايتارلىقتاي دامىپ جاتقان جوق. بىلتىر ۆەنەسۋەلاعا ءبىر ميلليون تۋريست كەلگەن. بۇل كورشىلەس كولۋمبيامەن سالىستىرعاندا 4 ەسەگە كەم.

www.24.kz