ەلباسىنىڭ «ءومىر وتكەلدەرى» كىتابى قازاقستاندىق پاتريوتيزمنىڭ ءىس جۇزىندەگى كورنەكتى وقۋلىعىنا اينالادى - گ. ءابدىقالىقوۆا
بۇل پىكىردى بۇگىن ەلوردادا اتالعان تۋىندىنىڭ تۇساۋكەسەر راسىمىنە ارنالعان سالتاناتتى شارادا ق ر مەملەكەتتىك حاتشىسى گۇلشارا ءابدىقالىقوۆا ءبىلدىردى.
«بۇل كىتاپتا ەل پرەزيدەنتى جاستىق شاعىنان باستالعان ءوزىنىڭ ءوسۋ-ورلەۋ جولدارىن بايانداي وتىرىپ، قازاقستاننىڭ كەڭەستەر كەزىندەگى احۋالى مەن تاۋەلسىزدىكتىڭ العاشقى جىلىنان بۇگىنگە دەيىنگى ءجۇرىپ وتكەن جولىن تەرەڭنەن قوزعالعان وي- تولعانىستارىمەن جەتكىزەدى. اتالعان شىعارمانىڭ قۇندىلىعى تۋرالى جەكە پىكىرىمدى ايتسام، ەلباسى مەن سۇحبات الۋشى اراسىنداعى ادەبي شىنايى اڭگىمەنىڭ ءوربۋى، ەگەمەندىك شەجىرەسىنە قاتىستى بۇرىن-سوڭدى ەستىمەگەن تىڭ دەرەكتەردىڭ ۇسىنىلۋى، «ۇشقان ۇيا ۇلاعاتى» اتتى تارماقپەن باستالىپ، «نۇرلى جولعا» ۇلاسۋى سياقتى ءومىرباياندىق سۇحباتتار تاريحي وقيعالارمەن ساباقتاستىرىلا رەت- رەتىمەن بەرىلۋى، سونداي-اق ءوزارا ديالوگ بارىسىنداعى ينتەللەكتۋالدىلىق پەن قازاقتىڭ شۇرايلى ءتىلى وقىرماندى وزىنە تارتاتىن ەرەكشە تۇستارىنىڭ قاتارىنا جاتقىزۋعا بولادى»، - دەدى مەملەكەتتىك حاتشى.
ونىڭ اتاپ وتۋىنشە، كىتاپتا ازيا مەن ەۋروپانى قاتار جايلاعان قازاق ەلىنىڭ ەكى ساياسي جۇيە - توتاليتاريزمنان دەموكراتياعا اياق باسۋى، ەكى ەكونوميكالىق جۇيە - جوسپارلى ەكونوميكادان نارىقتىق ەكونوميكاعا كوشۋدەگى قيىن شاقتار جان- جاقتى ايتىلادى.
اسىرەسە، تاۋەلسىزدىك باسىنداعى سەمەي يادرولىق پوليگونىن جابۋ، «بايقوڭىر» عارىش ايلاعىنىڭ مارتەبەسىن بەلگىلەۋ، مەملەكەتتىك شەكارانى مەجەلەۋ كەزىندەگى ەلباسىنىڭ ەرەكشە ساياي ەرىك-جىگەرى مەن كورەگەن ديپلوماتتىلىعى، ساڭلاق ساياساتكەرلىگى سان قىرىنان اشىپ كورسەتىلەدى. كىتاپتى وقي وتىرىپ، ەلارالىق كەلىسىمدەر مەن كەلىسسوزدەردەگى مەملەكەت باسشىسىنىڭ سۇڭعىلا ساياساتكەرلىگى مەن حاريزمالىق وي-ءورىسىن، مۇقالماس قاجىر-قايراتىن شىنايى سەزىنىپ، تاڭدانىس جانە ماقتانىش سەزىمى كەرنەيدى.
«سوندىقتان بۇل كىتاپتى بىرىنشىدەن، پرەزيدەنتتىڭ ۇلى ىستەرى مەن ۇلاعاتتى ءومىرى جايىنداعى تولىق عۇمىرباياندىق شىعارمالاردىڭ ءبىرى رەتىندە باعالاۋعا بولادى. ەكىنشىدەن، قازىرگى زامانعى قازاقستاندىق مەملەكەتتىلىكتىڭ باعا جەتپەس دەرەككوزى رەتىندە قۇندى بولىپ وتىر. ۇشىنشىدەن، بۇل كىتاپ قازاقستاندىق پاتريوتيزمنىڭ ءىس جۇزىندەگى كورنەكتى وقۋلىعىنا اينالماق. ياعني، ەلباسىنىڭ عيبراتتى عۇمىرى ايشىقتالعان اتالعان كىتاپ مەملەكەت جانە قوعام قايراتكەرلەرىنىڭ، مەملەكەتتىك قىزمەتشىلەردىڭ، عالىمدار مەن ستۋدەنتتەردىڭ، جالپى جۇرتشىلىقتىڭ ەرەكشە قىزىعۋشىلىعىن تۋدىراتىنى انىق»، - دەدى گ. ءابدىقالىقوۆا.
اۆتور: مارلان جيەمباي
