ۇلان-باتىردا ن. نازاربايەۆتىڭ موڭعول تىلىنە اۋدارىلعان «جىلدار مەن ويلار» كىتابىنىڭ تۇساۋكەسەرى ءوتتى
شاراعا موڭعوليادا تىركەلگەن ديپلوماتيالىق كورپۋس، حالىقارالىق ۇيىمدار وكىلدەرى، قازاق دياسپوراسى، عىلىمي جانە ىسكەر توپ وكىلدەرى، سونداي-اق موڭعوليا پارلامەنتى دەپۋتاتتارى، مينيسترلىكتەر جانە جەرگىلىكتى ۆەدومستۆولار وكىلدەرى قاتىستى.
ءوز سوزىندە ەلشى قالىبەك قوبلاندين اتالعان كىتاپتا ق ر تۇڭعىش پرەزيدەنتى ن. نازاربايەۆتىڭ سويلەگەن سوزدەرى، ماقالالارى جانە باياندامالارىنان ۇزىندىلەر جانە ويلارى كەلتىرىلگەنىنە قاتىسۋشىلاردىڭ نازارىن اۋداردى.
موڭعوليا عىلىم اكادەمياسىنىڭ پرەزيدەنتى، اكادەميك باتبولدىن ەنحتۋۆشين قازاقستان رەسپۋبليكاسى باسشىسىنىڭ ساياسي، عىلىمي جانە پۋبليتسيستيكالىق تۋىندىلارعا ساراپتامالار نەگىزىندە جارىق كورگەن كىتاپتىڭ الەۋمەتتىك ماڭىزعا يە بولا وتىرىپ، عىلىمي-اعارتۋشىلىق جانە تاربيەلىك ءمانى زور ەكەندىگىنە باسا كوڭىل ءبولدى.
ق ر پرەزيدەنتى ن. نازاربايەۆتىڭ ەلدىڭ دامۋىنداعى رولىنە جوعارى باعا بەرگەن موڭعوليانىڭ تۇڭعىش پرەزيدەنتى پۋنسالمااگيين وچيرباتتىڭ سوزىنە ەرەكشە توقتالعان ءجون.
ونىڭ پىكىرىنشە، سوڭعى جىلداردا قازاقستاننىڭ جەتىستىكتەرى نەگىزىنەن ەگەمەندى ەل رەتىندە قازاقستاننىڭ مۇددەسىنەن شىعاتىن ەلباسىنىڭ سارابدال ساياساتى مەن تاجىريبەسىنىڭ ارقاسىندا قول جەتكىزىلگەن.
ءوز كەزەگىندە موڭعوليا ۇلى مەملەكەتتىك حۇرالى (پارلامەنتى) مەملەكەتتىك قۇرىلىم جونىندەگى كوميتەتىنىڭ ءتوراعاسى اعىپار ۇلى باكەي قازاقستان باسشىسىنىڭ اتالعان تۋىندىسى مەملەكەت باسشىسىنىڭ قيىن دا سان-سالالى قىزمەتىن تولىعىمەن سيپاتتايتىندىعىن اتاپ ءوتتى.
