قىتايدا «ستۋدەنتتىڭ ورنىنا ساباققا بارۋ» بيزنەسى ورلەۋدە

استانا. قازاقپارات - قىتايلىق ستۋدەنتتەر ساباققا ءتۇرلى سىلتاۋمەن ساباققا بارماي قالادى. ولاردىڭ اراسىندا تۇنگى اۋىسىمدا جۇمىس ىستەيتىندەر مەن ءجاي عانا قىدىرۋدان قولى تيمەيتىندەر دە بار.

ءبىراق سوعان قاراماستان، بۇل ستۋدەنتتەر وزگە بىرەۋ ارقىلى ساباققا قاتىسىپ، وقىتۋشىنىڭ جۋرنالعا قوياتىن «كەلگەن جوق» بەلگىسىن المايدى. مۇنىڭ قۇپياسى ولاردىڭ باسقا بىرەۋگە اقشا تولەپ، سول ادامدى ءوز ورنىنا ساباققا جىبەرەتىنىندە ەكەن، دەپ حابارلايدى epochtimes.ru.

بۇل ءۇشىن جوعارى وقۋ ورنىنداعى ساباققا بارعىسى كەلمەگەن ستۋدەنت الەۋمەتتىك جەلى ارقىلى تولىق اتى-ءجونىن، ءوزى قاتىسپايتىن ساباقتىڭ ءوتۋ ۋاقىتىن، تاعى باسقا دا قاجەتتى مالىمەتتى جاريالايدى.

ال مۇنى ءبىلىپ العان «ستۋدەنت ورنىنا ساباققا بارعىش» ادام وعان حابارلاسىپ، ەكەۋى كەلىسەدى. مۇنداي قىزمەتتىڭ ءتۇرى 45 مينۋت دارىسكە قاتىسۋ ءۇشىن 25 يۋان (شامامەن 600 تەڭگەدەن استام سوما) تۇرادى ەكەن.

ال ەگەر ول ادامدى كوبىرەك ۋاقىتقا جالدايتىن بولسا، باعاسى ارزانعا تۇسەدى. ەندى سونداي ادامداردى قاراستىرىپ، كەسكىن-كەلبەتى ۇقساس ۇمىتكەرلەردى ىزدەستىرەتىن دەلدالدار پايدا بولىپتى.

ولار ستۋدەنتكە دۋبلەر تاپقانى ءۇشىن 5 يۋان سۇراپ ءجۇر ەكەن. جالپى «ستۋدەنت ورنىنا ساباققا بارۋشىنىڭ» جۇمىسى قيىن ەمەس. بار بولعانى اۋديتورياعا كىرىپ وتىرىپ، وقىتۋشى جۋرنال بويىنشا تۇگەندەگەندە، «مۇندامىن» دەسە بولدى. ال ەگەر كەنەتتەن وزگە سۇراق قويىلىپ قالسا، ول بەرەتىن جاۋاپ «بىلمەيمىن» بولۋى ءتيىس ەكەن. قازىر بۇل بيزنەس ءتۇرى ەلدىڭ بىرنەشە قالاسىندا ورلەۋدە.

www.24.kz