باسشىلىق الدىندا ەرەكشەلەنگىسى كەلگەن پوليتسەيلەردىڭ قىلمىستىق ارەكەتى اشكەرە بولدى

استانا. قازاقپارات - جامبىل وبلىسى ت. رىسقۇلوۆ اۋداندىق ىشكى ىستەر باسقارماسىنىڭ جەدەل ۋاكىلى ج. كوجاكوۆ پەن تاراز قالاسى ىشكى ىستەر باسقارماسىنىڭ جەدەل ۋاكىلى ج. الاشبايەۆ جۇمىستاعى كورسەتكىشتەرىن قىلمىستىق جولمەن كوتەرىپ، باسشىلار الدىندا ەرەكشەلەنىپ، قىزمەت بابىمەن جوعارلاماق بولعان.

وسىعان وراي، مانساپ ءۇشىن قىلمىس جاساعان پوليتسيا قىزمەتكەرلەرىنە جاقىندا تاراز قالاسىنىڭ №2 سوتىنىڭ ۇكىمى شىقتى. بۇل تۋرالى جامبىل وبلىستىق پروكۋراتۋراسىنىڭ باسپا ءسوز قىزمەتىنەن حابارلاندى.

«ق ر ق ك-نىڭ 296 -بابىنىڭ 4 -بولىگى (اسا ءىرى مولشەردەگى ەسىرتكى زاتتاردى زاڭسىز يەمدەنۋ جانە ساقتاۋ)، 362-بابىنىڭ 4-بولىگىنىڭ 3 -تارماعى (لاۋازىمدىق وكىلەتتىكتەردى اسىرا پايدالانۋ) جانە 416-بابىنىڭ 3-بولىگىمەن (جەدەل- ىزدەستىرۋ ماتەريالداردى بۇرمالاۋ) كىنالى دەپ تانىلىپ، ج. الاشبايەۆ 6 جىلعا، ج. كوجاكوۆ 5 جىلعا باس بوستاندىقتارىنان ايىرىلدى»، دەلىنگەن باسپا ءسوز بايانىندا.

بۇدان بولەك، پوليتسەيلەر ارنايى شەندەرى مەن مۇلىكتەرىنەن ايىرىلىپ، ولارعا ءومىر بويىنا مەملەكەتتىك ورگاندارىندا قىزمەتپەن اينالىسۋ قۇقىعىنا تىيىم سالىندى.

جامبىل وبلىسى پروكۋراتۋراسىنىڭ ارنايى پروكۋرورلار باسقارماسى سوتقا دەيىنگى تەرگەۋ امالدارىن جۇزەگە اسىرعان.

اۆتور: قانات مامەتقازى ۇلى