قار قابىلانى مەن قارا ايۋدىڭ تەرىسىن زاڭسىز اۋلاپ، ساتۋمەن اينالىسقاندار ۇستالدى - كەسكىن

استانا. قازاقپارات - قىلمىستىق ىزدەستىرۋ باس باسقارماسىنىڭ جەدەل قىزمەتكەرلەرى سيرەك كەزدەسەتىن جابايى جانۋارلار - قار قابىلانى مەن قارا ايۋلاردى زاڭسىز اتۋ فاكتىلەرىن انىقتادى، دەپ حابارلادى كيرتاگ قىرعىزستان ءى ءى م باسپا ءسوز قىزمەتىنە سىلتەمە جاساپ.

«2015 -جىلعى ماۋسىمدا ءى ءى د ق ءى ب ب قىزمەتكەرلەرى بەلگىسىز بىرەۋلەردىڭ سيرەك كەزدەسەتىن جانۋارلاردىڭ تەرىسىن ساتپاقشى بولعانى جايلى اقپارات الادى. جەدەل- ىزدەستىرۋ شارالارى بارىسىندا قىزىل كىتاپقا ەنگىزىلگەن سيرەك كەزدەسەتىن جانۋارلاردى زاڭسىز اتىپ، ساتۋمەن اينالىسقان ادامدار انىقتالدى»، - دەلىنگەن حابارلامادا.

سوكۋلۋك اۋدانىندا ماۋسىمنىڭ باسىندا ەكى ەر ادامنىڭ قولعا تۇسكەنى اتاپ وتىلەدى.

«ۇستالعان ادامداردان 4 قاپ تاركىلەنگەن، وندا: ءبىر قار قابىلانىنىڭ باس سۇيەگى مەن تەرىسى، قارا ايۋدىڭ ەكى باس سۇيەگى مەن ءۇش تەرىسى بولعان. جەدەل دەرەكتەرگە سايكەس ولار تەرىلەردى 8 مىڭ دوللارعا ساتپاقشى بولعان»، - دەپ حابارلادى ءى ءى م.

زاڭسىز اڭشىلىق فاكتىسى بويىنشا قىلمىستىق ءىس قوزعالدى.