بۇكىل الەمدىك يسلام عۇلامالارى ي ش ي ر-گە قاتىستى مالىمدەمە جاريالادى

استانا. قازاقپارات - سوڭعى كەزدە سيريا مەن يراك ەلدەرىندەگى قاراما-قايشى كوزقاراستاردىڭ تۋىنداۋىنا، ەكى ەلدىڭ تىنىشتىعىن بۇزىپ، حالىقتىڭ وتانىنان بەزىپ كورشىلەس ەلدەردەن پانا ىزدەۋىنە بىردەن ءبىر سەبەپكەر - ي ش ي ر.

عالىمدار بۇگىندە ي ش ي ر -دىڭ (يسلام مەملەكەتىنىڭ - رەد.) يسلام اتىنا كىر كەلتىرەتىن تەرىس پيعىلدى ارەكەتتەرىن قاتتى سىنعا الىپ، ارنايى ءپاتۋا شىعارىپ، ءوز كوزقاراستارىن بىلدىرۋدە. ءپاتۋالار مەن عالىمداردىڭ كوزقاراستارى اراب-اعىلشىن تىلدەرىندە جارىق كورۋدە. نازارلارىڭىزعا بۇكىل الەمدىك مۇسىلمان عۇلامالار ۇيىمىنىڭ ي ش ي ر-گە قاتىستى تۇجىرىمداماسىن ۇسىنامىز.

بۇكىل الەمدىك مۇسىلمان عۇلامالار ۇيىمى

اسا قامقور ەرەكشە مەيىرىمدى اللانىڭ اتىمەن باستايمىن!

بۇكىل الەمدىك مۇسىلمان عۇلامالار ۇيىمى قازىرگى تاڭدا ي ش ي ر  دەپ تانىلعان ۇيىمنىڭ ۇستانىمدارى مۇحاممەد پايعامبار الىپ كەلگەن يسلام دىنىنە سايكەس كەلمەيتىنىن ايتقىسى كەلەدى. بۇگىندە ي ش ي ر - دەن مۇسىلماندارعا پايداسىنان گورى زيان شەگىپ جاتقان جايى بار. بارشامىز تاريحتان بىلەتىندەي، حاليفات استىندا ءومىر سۇرگەن مۇسىلماندار قاشاندا باقىت پەن قۋانىشقا كەنەلىپ، وزگە ءدىن وكىلدەرىمەن تاتۋ ءومىر سۇرگەن.

قازىرگى جاعدايعا بايلانىستى عۇلامالار ۇيىمى ي ش ي ر - گە قاتىستى تومەندەگىدەي تۇجىرىم ايتادى:

راسىندا، ءبىز مۇحاممەد پايعامبار جولىنا سايكەس حاليفاتتىقتى قاشاندا اڭساپ كەلەمىز. ول حاليفاتتىڭ وزىندىك شارتتارى مەن ەرەجەلەرى بار. ۇستانىمدارى تولىق يسلام شاريعاتىنا سايكەس كەلۋى كەرەك.

حاليفات جاريالانعان ەلدىڭ بارلىق ىشكى دە سىرتقى ماسەلەلەرى حالىقپەن كەڭەسۋ ارقىلى شەشىمىن تابادى. ويتكەنى، قۇراندا اللا تاعالا: «ەي، مۇحاممەد، ولارمەن (مۇسىلماندارمەن) كەڭەسىپ، اقىلداسىپ قادام جاسا» دەگەن. كەرەك دەسەڭىز جاڭا تۋىلعان نارەستەنىڭ ەمۋى مەن تاماقتانۋ ماسەلەسى دە كەڭەسۋ ارقىلى جۇزەگە اسادى.

وكىنىشكە قاراي، قازىرگى يراك جەرىندەگى حاليفات ءوز دەگەندەرىن جۇزەگە اسىرىپ، باسقا مۇسىلماندارمەن ساناسپاستان جەكە باعىتتا مەملەكەت قۇرىپ العان. ءتىپتى، بۇل قۇرىلعان مەملەكەتتى حاليفات دەپ ايتۋعا دا ءتىل بارمايدى.

ي ش ي ر  قازىرگى تاڭدا بۇكىل الەمدى ۇرەيلەندىرىپ، حالىقتىڭ نازارىن وزىنە اۋدارۋدا. ولاردىڭ ۇستانعان جولدارى، ارەكەتتەرى مەن شەشىمدەرى تەك وزدەرىنىڭ كوزقاراسىمەن عانا جۇزەگە اسادى. الايدا، مۇسىلمان ۇمبەتى تۇرعاندا وسىنداي بىربەتكەيلىك ارەكەت قاشاندا قۇلدىراۋعا الىپ كەلەدى. سەبەبى، تاريحتان بەلگىلى يسلام حاليفاتى كەزىندە حالىقتىڭ اراسىندا قانداي دا ۇلكەندى- كىشىلى ماسەلە تۋىنداسا ونى عۇلامالارمەن بىرلەسە وتىرىپ شەشىمىن تاۋىپ وتىرعانى بەلگىلى.

شىنايى حاليفات حالىقتىڭ تاتۋلىعىن كوزدەپ بۇلىككە جول بەرمەيدى. قازىرگى ي ش ي ر - دىڭ جانتۇرشىگەرلىك ارەكەتى ادامدار اراسىندا وزدەرىنە دەگەن تەرىس كوزقاراستى قالىپتاستىرىپ ۇلگەردى. بۇدان سوراقىسى، ول تاريح كۋا بولعان شىنايى حاليفاتتىڭ بەينەسىن قارا ەتىپ كورسەتىپ وتىر.

اللام بىزدەرگە تۋرا جول كورسەتەر اقىل بەرە گور جانە اداسۋدان ساقتا!

BAQ.kz