ق ر سىرتقى ىستەر مينيسترلىگى شەكارادا قازاقستان ازاماتىن اتىپ تاستاۋىنا قاتىستى وزبەكستانعا نارازىلىق نوتاسىن جولداماق

استانا. قازاقپارات - ق ر سىرتقى ىستەر مينيسترلىگى وزبەك شەكاراشىلارىنىڭ قازاقستان ازاماتىن اتىپ تاستاۋىنا قاتىستى مالىمدەمە جاسادى.

«28 -ماۋسىم كۇنى ءۋاليحان احمەتوۆ وققا ۇشتى. ول 1978 -جىلى تۋعان، و ق و سارى اعاش اۋدانى قىزىل اسكەر اۋىلىنىڭ تۇرعىنى. وسى ورايدا، ق ر س ءى م ءۋاليحان احمەتوۆتىڭ قازاسىنا بايلانىستى تۋعان- تۋىستارىنا، جاقىندارىنا كوڭىل ايتادى. بۇل وقيعاعا قازاقستان تاراپى نارازىلىق بىلدىرەدى. بەيبىت كۇندە قازاقستان ازاماتتارىنا قارۋ قولدانۋ قازاقستان مەن وزبەكستان اراسىنداعى ارىپتەستىك، باۋىرلاستىق، ستراتەگيالىق قارىم-قاتىناستارعا قايشى كەلەتىندىگىن اتاپ وتەمىز. ءبىز اتالمىش وقيعانىڭ ەگجەي-تەگجەيلى ءارى جان-جاقتى تەرگەۋدى تالاپ ەتەمىز. سەبەبى وزبەكستان شەكاراسىن كەسىپ وتەتىن جەرلەردە قازاقستان ازاماتتارىنا قارۋ قولدانۋ قيسىنسىز شارا دەپ ەسەپتەيمىز. ءبىز بۇل وقيعانىڭ مۇقيات تەرگەلۋىن تالاپ ەتەمىز. تولىق اقپارات ۇسىنىلىپ، كىنالىلەر جازالانۋى ءتيىس. قازاقستان سىرتقى ىستەر مينيسترلىگى نارازىلىق نوتاسىن دايىندادى»، - دەدى ق ر س ءى م رەسمي وكىلى التاي ابيبۋللايەۆ.

رەسمي وكىلدىڭ اتاپ وتكەنىندەي، نوتانى تابىستاۋ ءۇشىن قازاقستانداعى وزبەكستان ەلشىسى مينيسترلىككە شاقىرتىلدى. ونىڭ سوزىنە قاراعاندا، زارداپ شەككەن تاراپقا قازاقستان زاڭدارىنا سايكەس كومەك كورسەتىلەدى.

ايتا كەتەيىك، وڭتۇستىك قازاقستان وبلىسىنىڭ وزبەكستانمەن شەكارالاس ايماعىندا وزبەك اسكەريلەرى قازاقستان ازاماتىن اتىپ تاستاعان بولاتىن.

قايعىلى وقيعا 28 -ماۋسىم كۇنى كەشكى ساعات 21:50 شاماسىندا بولعان. قازاقستاننىڭ ەكى ازاماتى سىرداريا وزەنىندە بالىق اۋلاعان. وزبەك شەكاراشىلارى ولارعا ون رەت وق اتقان. سونىڭ ەكەۋى 36 جاستاعى ءۋاليحان احمەتوۆكە تيگەن. ەكىنشى بالىقشى امان.

مارقۇمنىڭ ارتىندا 7 بالاسى قالدى.

اۆتور: جاسۇلان جولدىبايەۆ