16:51, 30 - ماۋسىم 2015 | GMT +6
ءتورت شاقىرىمعا سوزىلعان اۋىزاشار داستارحانى جايىلدى
استانا. قازاقپارات - اۋقىمدى اۋىزاشار داستارحانىن دايىنداۋ مىسىر ەلىندە الدەقاشان داستۇرگە اينالعان. ولار مەشىت ماڭايىندا، الاڭقايلارعا داستارحان جايىپ، بارلىق جاندى اۋىزاشارعا شاقىرادى.
الەكساندريا قالاسىنىڭ ستۋدەنتتەرى وسى ءداستۇردى جاڭعىرتا وتىرىپ، اۋىزاشار داستارحانىن دايارلاۋدا رەكوردتىق كورسەتكىشكە قول جەتكىزدى. ولاردىڭ تەڭىز جاعالاۋىنا جايعان داستارحاندارىنىڭ ۇزىندىعى ءتورت شاقىرىمعا سوزىلعان. اتالمىش شاراعا گيننەستىڭ رەكوردتار كىتابى وكىلدەرى ارنايى كەلىپ قاتىسقان. داستارحاننىڭ ءدالما- ءدال ۇزىندىعى 4303 مەتر بولىپ شىقتى. بۇل كورسەتكىش يتاليادا جايىلعان داستارحاننان ەكى ەسە ۇزىن بولىپ شىقتى.
اۋىزاشارعا 10000-نان استام ادام قاتىسادى دەپ جوسپارلانعان بولاتىن. الايدا، ناقتى سانىن انىقتاۋ مۇمكىن بولماعان.
